14 listapada pačałasia adpraŭka hramadzian Biełarusi, pryzvanych na terminovuju vajennuju słužbu, słužbu ŭ reziervie, u złučeńni i vajskovyja čaści Uzbrojenych sił, inšyja vojski i vajskovyja farmiravańni.
Jak paviedamlaje pres-słužba Ministerstva abarony, u pieršy dzień adpraŭki ŭ vojski nakiravana kala 1.200 pryzyŭnikoŭ, jakija papoŭniać rady sił śpiecyjalnych apieracyj, roty hanarovaj varty i miechanizavanych złučeńniaŭ.
Usiaho na ŭkamplektavańnie Uzbrojenych sił, inšych vojskaŭ i vajskovych farmiravańniaŭ Biełarusi płanujecca nakiravać da 10 tysiač čałaviek. Akramia taho, dla prachodžańnia słužby ŭ reziervie ŭ hety ž pieryjad płanujecca nakiravać kala 2 tysiač čałaviek.
U adpaviednaści z zakanadaŭstvam vykliku na pryzyŭnyja kamisii vosieńniu hetaha hoda padlahaje kala 99 tysiač maładych ludziej.
Ciapier u vajennych kamisaryjatach krainy zaviaršajecca miedycynski ahlad pryzyŭnikoŭ. Pryzyŭnymi kamisijami rajonaŭ (haradoŭ) u dačynieńni da hramadzian užo pryniata bolš za 65 tysiač rašeńniaŭ. Dadziena bolš za 32 tysiač adterminovak, bolšuju častku ź jakich (68%) składajuć adterminoŭki dla praciahu adukacyi. Akramia taho, dadzienyja adterminoŭki hramadzianam pa stanie zdaroŭja, siamiejnym stanoviščy, dla atrymańnia vajenna-techničnych śpiecyjalnaściej i ŭ suviazi z ažyćciaŭleńniem deputackich paŭnamoctvaŭ.
Pradstaŭniki vajskovych čaściej zaviaršyli płanavuju rabotu ŭ vajennych kamisaryjatach rajonaŭ (haradoŭ) pa ŭsiebakovym vyvučeńni i adbory pryzyŭnikoŭ dla kamplektavańnia Uzbrojenych sił, inšych vojskaŭ i vajskovych farmiravańniaŭ.
Adpraŭka novaha papaŭnieńnia ŭ vojski z abłasnych zbornych punktaŭ krainy, jakaja pačałasia siońnia, budzie doŭžycca da 28 listapada.
