Tak, 24 kastryčnika Kamitet AAN pa pravach čałavieka pryznaŭ, što dziaržava Biełaruś parušyła jaho pravy, harantavanyja artykułami 9 (prava na svabodu i asabistuju niedatykalnaść), 14 (prava na spraviadlivy sudovy razhlad) i 22 (svaboda asacyjacyj) Mižnarodnaha pakta ab hramadzianskich i palityčnych pravach.
Heta rašeńnie, jakoje było pryniata pa indyvidualnym paviedamleńni žonki Alesia Bialackaha Natalli Pinčuk, źjaŭlajecca, jak adznačajuć u pravaabarončaj arhanizacyi, «važnym pasłańniem usim režymam, jakija manipulujuć zakanadaŭstvam dla taho, kab zahłušyć pratestavyja hałasy, parušajučy tym samym svabodu asacyjacyj».
Pravaabarončaja arhanizacyja «Viasna», jakoj kiravaŭ Aleś Bialacki, była ŭ 2003 pazbaŭlena dziaržaŭnaj rehistracyi. Paśla hetaha jaje zasnavalniki trojčy (ŭ 2007 i 2009 hadach) źviartalisia ŭ Miniust pa rehistracyju, ale atrymlivali admovy. Pavodle vysnoŭ Kamiteta, parušeńniem svabody asacyjacyi źjaŭlajucca admovy ŭ dziaržaŭnaj rehistracyi pravaabarončaha centra «Viasna», pryniatyja tolki na padstavie taho, što ŭ padadzienych na rehistracyju dakumientach byli niaznačnyja nieadpaviednaści patrabavańniam Ministerstva justycyi, jakija mahli być vypraŭlenyja pry davańni ministerstvam takoj mahčymaści zasnavalnikam.
Admovy ŭ rehistracyi, ličać u Kamitecie, pryviali da zabarony dziejnaści arhanizacyi na terytoryi Biełarusi i pieraškodzili realizacyi jaje členami svaich pravoŭ. Prysud Alesia Bialackaha da praciahłaha terminu pazbaŭleńnia voli za dziejańni, źviazanyja z atrymańniem i raschodavańniem srodkaŭ na finansavańnie dziejnaści ŭznačalenaj im arhanizacyi, byŭ pramym vynikam parušeńnia svabody asacyjacyi, havorycca ŭ zaklučeńni Kamiteta. Pry razhladzie spravy biełaruskija sudy abvierhli dokazy taho, što hetyja srodki pryznačalisia i vykarystoŭvalisia mienavita na ŭkazanyja mety, i nie razhladali spravu z punktu hledžańnia harantyj prava na svabodu asacyjacyi. U hetych umovach pryciahnieńnie Alesia Bialackaha da kryminalnaj adkaznaści Kamitet rascaniŭ jak parušeńnie hetaha prava.
«Takoje rašeńnie Kamiteta pa pravach čałavieka na asnovie mižnarodnaha prava pryznaje lehitymnaść dziejnaści pravaabarončaha centra «Viasna» i poŭnaściu reabilituje jaho kiraŭnika Alesia Bialackaha»,
— zajaviŭ namieśnik staršyni «Viasny» Valancin Stefanovič.
Kamitet pa pravach čałavieka taksama zaklučyŭ, što ŭtrymańnie pad vartaj Alesia Bialackaha ŭ pieryjad papiaredniaha rasśledavańnia mieła advolny charaktar, pakolki rašeńnie pra aryšt prymaŭ prakuror, a nie sud i zasnoŭvałasia tolki na ciažkaści vystaŭlenaha abvinavačvańnia, a nie na faktach, jakija śviedčać pra nieabchodnaść i metazhodnaść hetaj miery.
Kamitet pryznaŭ, što padčas kryminalnaha pieraśledu Alesia Bialackaha była parušana prezumpcyja nievinavataści, što vyjaviłasia ŭ infarmacyi dziaržaŭnych ŚMI i vykazvańniach prezidenta, jakija da pravamocnaści pryhavoru suda śćviardžali vinu Bialackaha, a taksama ŭ tym, što padčas sudovych pasiadžeńniaŭ jaho ŭtrymlivali ŭ kletcy i dastaŭlali ŭ sud u kajdankach.
U rašeńni Kamiteta pa pravach čałavieka ŭkazana, što Bialacki maje prava na naležnyja srodki pravavoj abarony, a mienavita: pierahlad zajavy «Viasny» ab dziaržaŭnaj rehistracyi, źniaćcie sudzimaści, adekvatnuju kampiensacyju, uklučajučy pakryćcio vypłat, praviedzienych pa sudovych rašeńniach. Akramia taho, Kamitet pastanaviŭ, što dziaržava pavinna pierahledzieć svajo ŭnutranaje zakanadaŭstva ab asacyjacyjach.
