Terarysty, uzbrojenyja siakieraj, nažami i pistaletam, napali ranicaj na sinahohu ŭ Jerusalimie. Jany zabili čatyroch čałaviek i paranili vosiem, u tym liku dvaich dziaciej. Pavodle papiarednich źviestak, napadniki byli paleścincami.
Napad adbyŭsia dosyć daloka ad Staroha horada, dzie raźmiaščajucca Chramavaja hara i Ściana Płaču, — u ultraartadaksalnym rajonie Ar-Noŭ na zachadzie Jerusalima, prykładna za 10 km ad Staroha horada. Tut na cichaj vulicy znachodzicca budynak, u jakim raźmiaščałasia niekalki sinahoh, a taksama aŭdytoryja dla navučencaŭ.
Terarysty abrali ranicu — 7.00, kali prychadžanie pačali źbiracca na malitvu.
Miarkujučy pa paviedamleńniach vidavočcaŭ i palicyi, dvoje ŭzbrojenych mužčyn zdoleli niezaŭvažanymi padyści da ŭvachodu ŭ sinahohu, dzie stajali jaŭrei, što źbiralisia na malitvu.
Terarysty vychapili zbroju — pistalet, nažy, a adzin pačaŭ razmachvać vostraj siakieraj. Pierad uvachodam było mała miesca — z dvuch bakoŭ stajali pryparkavanyja aŭtamabili.
Tamu napadnikam udałosia paranić dosyć vialikuju kolkaść ludziej. Zatym jany zabiehli ŭnutr sinahohi i napali na ludziej, jakija byli ŭnutry.
Vidavočcy kazali, što napadniki kryčali «Ałach Akbar». Ich tvary byli zakrytyja chustkami.
Supracoŭnik słužby biaśpieki adkryŭ ahoń ź pistaleta. Da jaho dałučylisia supracoŭniki palicyi. U vyniku dva napadniki byli zabityja. Pa papiarednich dadzienych, abodva byli arabami, vierahodna, paleścincami.
Paleścinski isłamiscki ruch CHAMAS, jakoje dziejničaje ŭ siektary Haza, uchvaliŭ zabojstva prychadžan, ale ustrymałasia brać na siabie adkaznaść.
