DARPA — dziaržaŭnaje ahienctva, jakoje zajmajecca raspracoŭkaj novych technałohij dla Pientahona, pracuje nad stvareńniem vajskovych «vobłačnych» bazaŭ źviestak, jakija nie zaležać ad najaŭnaści ŭ rajonie interneta.
Ministr abarony ZŠA Čak Chejhieł zahadaŭ pravieści maštabnuju pravierku vajskovych navukova-daślednickich prajektaŭ, na jakija Pientahon vydatkoŭvaje $150-160 miljardaŭ u hod, paviedamiŭ sajt nationaldefensemagazine.org.
Chejhieł choča viarnucca da stratehii, jakuju ZŠA vykarystoŭvali padčas Chałodnaj vajny, kali było vyrašana adkazvać na kolkasnuju pieravahu armij krain Varšaŭskaj damovy ŭ Jeŭropie technałahičnaj daskanałaściu ŭ sfery jadziernych uzbrajeńniaŭ, mikraelektroniki i IT.
Pientahon pasprabuje vykarystać anałahičny adkaz na «źjaŭleńnie novych technałohij, novych śmiarotnych i časta asimietryčnych pahrozaŭ, novych dziaržaŭnych i niedziaržaŭnych subjektaŭ», skazaŭ ministr padčas kanfierencyi Reagan Defense Forum.
Rasija i Kitaj inviestavali ŭ novyja technałohii za tyja 10 hod, kali amierykanskija vajskoŭcy viali ciažkuju baraćbu z bajavikami-isłamistami ŭ Irakie i Afhanistanie. Ciapier ZŠA miarkujuć, što najlepšaj stratehijaj budzie raźvićcio robatatechniki, aŭtanomnych sistem i sposabaŭ apracoŭki vialikich abjomaŭ dadzienych.
«Hetaja prahrama praciahniecca ŭ hetym i nastupnym dziesiacihodździ. U joj buduć udzielničać niekatoryja z samych lepšych rozumaŭ ź dziaržaŭnych i niedziaržaŭnych strukturaŭ», — zaznačyŭ Chejhieł.
