Nie tak daŭno finskaja kampanija była hałoŭnym hulcom na rynku mabilnych telefonaŭ, ale kampanija nie pieražyła kankurencyi z Apple. Telefonny biznes Nokia byŭ vykupleny kampanijaj Microsoft, jakaja ź ciaham času admoviłasia ad brendu Nokia, pierajmienavaŭšy liniejku smartfonaŭ Nokia Lumia ŭ Microsoft Lumia.
Sama Nokia nie maje prava vypuskać smartfony pad brendam Nokia. Ale ž zvarotny šlach na mabilny rynak znajšła: vypuskać płanšety Nokia nie zabaroniena. Svoj pieršy płanšet «Nokija biez Nokii» pradstaviła 18 listapada.
Nokia N1 źniešnie praktyčna całkam paŭtaraje 8-calevy iPad mini kampanii Apple: dyjahanal ekrana 7.9 calaŭ, suadnošańnie bakoŭ 4:3, razroźnieńnie 2048x1536, dyzajn aluminijevaha korpusu praktyčna nie adroźnivajecca ad «ajpada», navat dynamiki vyhladajuć tak ža. Taŭščynia płanšeta taksama nievialikaja, 6.9 mm.
Płanšet N1 stanie pieršym ci adnym ź pieršych, u jakim port microUSB budzie dvuchbakovym — kabiel u jaho možna ŭstaŭlać «dahary nahami», jak i ŭ firmovy port Apple na iPhone I iPad. Navat sajt płanšeta niešta vielmi nahadvaje.
Płanšet pracuje na Android viersii 5.0 ź firmovym interfiejsam Nokia Z Launcher. Jaho «pałymiany mator» — 4-jadzierny pracesar Intel Atom Z3580, na borcie 2 Hb apieratyŭnaj pamiaci i 32 Hb unutranaj pamiai, kamiery na 8 i 5 Mp.
Svaich zavodaŭ Nokia ŭžo nie maje — płanšet budzie vyrablacca ŭ Kitai siłami kampanii Foxconn.
U prodaž jon pastupić mierkavana 19 lutaha — na kitajski novy hod i tolki ŭ Kitai. Paźniej kampanija pastavić hadžet u Rasiju i Jeŭropu. Kitajskaja cana — mierkavana 249 dalaraŭ biez uliku padatkaŭ. Dla paraŭnańnia, iPad mini 3 kaštuje 399 dalaraŭ, a iPad mini 2 — 299.
