Homielski abłasny sud 18 listapada razhledzieŭ kasacyjnuju skarhu na rašeńnie suda Centralnaha rajona ab admovie ŭ zadavalnieńni skarhi sustaršyni zarehistravanaj ŭ Čechii arhanizacyi «Małady front» Andreja Cianiuty. Adkazčykam pa spravie źjaŭlaŭsia Homielski dziaržaŭny ŭniviersitet, adkul aktyvist byŭ adličany.
Nahadajem, były student paličyŭ adličeńnie niezakonnym i palityčna matyvavanym i padaŭ skarhu ŭ sud. Padstavami dla adličeńnia byli nazvanyja rašeńni suda. Spačatku Cianiutu pryznali vinavatym u «parušeńni paradku praviadzieńnia masavaha mierapryjemstva», kali toj z tavaryšami ŭskładaŭ kvietki ŭ Homieli ŭ pamiać ab zahinułych u Kijevie. A nieŭzabavie jon byŭ aryštavany na 10 sutak za nibyta niecenzurnuju łajanku i niepadparadkavańnie patrabavańniam supracoŭnikaŭ milicyi napiaredadni čempijanatu śvietu pa chakiei ŭ Minsku.
Sud Centralnaha rajona Homiela vynies rašeńnie pa skarzie Cianiuty 1 kastryčnika, admoviŭšy ŭ jaje zadavalnieńni i pryznaŭšy adličeńnie zakonnym. Adnak Cianiuta padaŭ kasacyjnuju skarhu ŭ abłasny sud, a nieŭzabavie atrymaŭ z suda Centralnaha rajona kopiju kasacyjnaha pratestu haradskoj prakuratury na rašeńnie rajonnaha suda. U kasacyjnym prateście prakuratury Homiela adznačana, u pryvatnaści, što «pa rašeńni suda nie bačna, na jakich padstavach sud pryjšoŭ da vysnoŭ, vykładzienych u rašeńni, jakimi dokazami jany paćvierdžany, ci adpaviadajuć vysnovy sudovaha rašeńnia faktyčnym abstavinam, što vyznačajucca pa spravie, ci ŭličany sudom usie fakty, jakija ŭvachodziać u pradmiet dokazaŭ pa spravie».
Na padstavie vyšejskazanaha prakuratura Homiela prasiła abłasny sud admianić rašeńnie suda Centralnaha rajona Homiela i nakiravać spravu na novy razhlad.
Ale jašče da sudovaha pasiadžeńnia stała viadoma, što prakuratura adklikała svoj pratest. Sud ža adchiliŭ kasacyjnuju skarhu Cianiuty i pakinuŭ rašeńnie rajonnaha suda ŭ sile.
