5 listapada, u suśvietny dzień «Staniem za žurnalistyku», siabry Biełaruskaj asacyjacyi žurnalistaŭ sfatahrafavalisia na fonie budynka z hrafici — vyjavami kletak, ź jakich vylatajuć zroblenyja z haziety ptuški.
Ciapier udzielnikaŭ fotasiesii vyklikajuć u milicyju Viciebska i składajuć pratakoły za «ŭdzieł u niesankcyjanavanaj akcyi».
18 listapada da načalnika adździeła achovy pravaparadku i prafiłaktyki AUS Čyhunačnaha rajona Alaksandra Rybakova vyklikali Źmitra Kazakieviča.
— Milicyjant skazaŭ mnie pa telefonie, što ja mušu pryjści i patłumačyć svoj udzieł u niesankcyjanavanaj akcyi. Ja vielmi ździviŭsia, bo ni ŭ jakich akcyjach nie ŭdzielničaŭ. Akazałasia, što «akcyjaj» milicyjant ličyć supolnyja fotazdymki niekalkich čałaviek, jakija byli vykładzienyja ŭ sacyjalnaj sietcy Facebook.
Supracoŭnik milicyi pakazaŭ mnie razdrukoŭki z sajtaŭ, dzie hetyja fotazdymki taksama byli apublikavanyja. I skazaŭ, što ŭ tekście da hetych fotazdymkaŭ havorycca, što heta była akcyja, choć takoha słova ja tam nie zaŭvažyŭ — havaryłasia tolki, što žurnalisty fatahrafavalisia, praviali fotasiesiju.
Na našych fotazdymkach vyrazna vidać, što my nie trymajem płakataŭ, ničoha nie kryčym i nie patrabujem. Tak što abvinavačańnie liču absalutna biespadstaŭnym. I napisaŭ u pratakole, što z farmuloŭkaj supracoŭnika milicyi ja nie zhodny.
Na siabra arhanizacyi byŭ składzieny pratakoł ab udziele ŭ niesankcyjanavanaj akcyi. Sud pa spravie Źmitra Kazakieviča pryznačany na 28 listapada.
Pa toj samaj spravie telefonnyja zaprašeńni ŭ milicyju atrymali jašče niekalki čałaviek. BAŽaviec Kastuś Mardźvincaŭ raspavioŭ pra svoj vizit u milicyju:
— Alaksandr Rybakoŭ skłaŭ pratakoł pra parušeńnie mnoju artykuła 23.34 KoAP — nibyta ja ŭdzielnik niesankcyjanavanaj akcyi. Jon kazaŭ, što ja vykazvaŭ svaje hramadskija intaresy, mierkavańni i hetak dalej, kali fatahrafavaŭsia na fonie zakinutaha budynka byłoha Doma kultury. Ja sprabavaŭ tłumačyć: «Na hetym budynku — vielmi pryhožy malunak, jaki lubiać mnohija žychary Viciebska, u tym liku i žurnalisty. Dyk što, malunak taksama kramolny, i «vyražaje niejkija hramadskija mierkavańni»? I mastaka taksama buduć pryciahvać da adkaznaści?»
Na hetyja pytańni milicyjant Alaksandr Rybakoŭ adkazaŭ, što da mastaka pretenzij niama, bo heta, maŭlaŭ, było daŭno. Urešcie ja admoviŭsia davać niejkija tłumačeńni, apielavaŭšy da artykuła 27 Kanstytucyi Respubliki Biełaruś, jaki daje kožnamu prava nie śviedčyć suprać siabie.
