U interv`iu rasijskamu ahienctvu TASS kiraŭnik viedamstva Siarhiej Dankviert rastłumačyŭ, što rašeńnie ab zabaronie pryniata pa vynikach maštabnaha manitorynhu hatovaj biełaruskaj pradukcyi, jakaja pastupaje ŭ Rasiju. «My miesiac tamu hetyja vyniki ŭžo adpravili biełaruskim kaleham», — padkreśliŭ kiraŭnik Raśsielhasnahladu.
Dankviert adznačyŭ, što viedamstva maje pretenzii i da inšych biełaruskich vytvorcaŭ miasnych vyrabaŭ, adnak vykazaŭ upeŭnienaść, što jany buduć uchilenyja padčas uzajemadziejańnia ź biełaruskaj vieterynarnaj słužbaj.
Pry hetym kiraŭnik viedamstva vykazaŭ mierkavańnie, što rezkaje padzieńnie jakaści pradukcyi vyklikana tym, što biełaruskija vytvorcy vykarystoŭvajuć tannuju syravinu, zakuplenuju ŭ Kanadzie.
Manitorynh Raśsielhasnahladu vyjaviŭ u pradukcyi pavyšanaje ŭtrymańnie antybijotykaŭ, salmaniełu, listeryi, u svaju čarhu ŭdakładniła načalnik adździeła mižnarodnaha supracoŭnictva viedamstva Daryna Isakava.
Pavodle jaje słoŭ,
abmiežavańni datyčacca takich pradpryjemstvaŭ, jak «Inka-Fud», «Babulina krynka», «Biełaviežskija dalikatesy», Biarozaŭski miasakansiervavy kambinat, Brescki miasakambinat, Homielski miasakambinat, Ahrakambinat «Dziaržynski», Smalavickaja brojlernaja ptuškafabryka i kampanija «Siervaluks».
Taksama Raśsielhasnahlad padrychtavaŭ rasparadžeńnie ab zabaronie tranzitu praduktaŭ ź Biełarusi ŭ Kazachstan biez rasijskaha nahladu.
«Dapuskajecca tranzit praz Rasijskuju Fiederacyju tolki pradukcyi, jakaja prajšła praz punkty propusku na rasijskaj miažy».
Takaja nieabchodnaść vyklikana vyjaŭleńniem vialikaj kolkaści kantrabandy padsankcyjnych praduktaŭ pa hetym kanale, padkreśliŭ jon. Adpaviednaje rasparadžeńnie viedamstva apublikuje najbližejšym časam, dadaŭ Dankviert.
Kiraŭnik rasijskaj vietsłužby nahadaŭ, što pad vyhladam pradukcyi dla Kazachstana ź Biełarusi ŭ Rasiju zajazdžajuć hružanyja fury, adnak kančatkovaj mety hruzy tak i nie dasiahajuć. Padobny kanał pastavak zamarožanaha jeŭrapiejskaha miasa Raśsielhasnahlad vyjaviŭ vosieńniu 2014 hoda, padkreśliŭ surazmoŭca ahienctva.
Adnak rasparadžeńnie ab zabaronie tranzitu praduktaŭ ź Biełarusi ŭ Kazachstan biez rasijskaha ahladu nie aznačaje poŭnaj zabarony na tranzit ź Biełarusi ŭ Kazachstan pa rasijskaj terytoryi. «Kali na Kazachstan iduć jabłyki, jany pavinny prajści praz punkty propusku na rasijskaj miažy, naprykład u Bransku ci Pskovie», — zaklučyŭ kiraŭnik Raśsielhasnahladu.
