Hałodnych hulniaŭ bolš nie budzie. U sieryi filmaŭ z Dženifier Łoŭrens u hałoŭnaj roli adbyŭsia rezki pierałom — jak siužetny, tak i žanravy. Z 20 listapada ŭ biełaruskich kinateatrach «Hałodnyja hulni. Sojka-pieraśmiešnica, častka 1».

Pieramožca kryvavych Hałodnych hulniaŭ Kitnis svajoj humannaściu i prahaj žyćcia kinuła palčatku ŭ tvar dyktataru postapakaliptyčnaha śvietu Panema. Jana abrała śmierć zamiest taho, kab zabivać svajho paplečnika Pita — ale ŭ Hulniach pavinien być pieramožca, tamu rasparadžalniki pakinuli žyćcio i joj, i Pitu.

 

U pomstu za toje ich razam ź pieramožcami papiarednich Hulniaŭ vyklikali na kvartalnyja Hałodnyja hulni: vyžyć musiŭ tolki adzin. Ale Kitnis znajšła vyjście i razburyła kupał nad Arenaj. Jak vyśvietliłasia, u krainie daŭno rychtavałasia revalucyja — paŭstancy ŭratavali dziaŭčynu, a ŭ krainie pačałosia paŭstańnie.

 

Usio heta viedajuć tyja, chto hladzieŭ papiarednija dva filmy albo čytaŭ raman-biestseler Sjuzan Kolinz. Tolki aŭtary filma paličyli nieabaviazkovym nahadvać hledaču, dzie jon.

Stužka pačynajecca z taho, što Kitnis pračynajecca ŭ lakarni Dystrykta 13 — padziemnym bunkiery pad razburanaj bambiožkaj častkaj Panema, jakaja 75 hod tamu padniała pieršaje paŭstańnie.

Amataram filma «Hałodnia hulni» na «Sojcy» chutčej za ŭsio budzie sumna. Samich Hałodnych hulniaŭ, zmahańnia za žyćcio ŭ asiarodździ zabojcaŭ paniavoli ŭ filmie nie budzie.

142 chviliny «Sojki» — pavolnaje, ale napružanaje apaviadańnie pra revalucyju jak miedyjapradukt.

Novy jaskravy piersanaž sieryi, prezident militarystyčnaha Dystrykta 13 Alma Kojn u vykanańni Džulijany Mur,

prahmatyčna raźličvaje, što vobraz Kitnis natchnić usiu krainu na paŭstańnie suprać dyktatury. Niama ničoha błahoha ŭ tym, kab prychavać stomlenuju i pierapužanuju dziaŭčynku ad vajny dy paru raz pastavić jaje pierad kamieraj.

Film «prasiadaje» na pieršych ža chvilinach.

«Ja nie chaču ničoha vyrašać, ja chaču Pita», — pa-dziciačamu ŭpirajecca Kitnis. Chacia rola achviary va ŭsich na vačach aktorcy Dženifier Łoŭrens, znajomaja praz uciečki jaje intymnych fota ŭ realnym žyćci, dla pierakanaŭčaj złoby i apatyi joj usio-ž patrebny ekšn. U jaje vydatna atrymlivałasia niazłomnaja Kitnis u pieršych dźviuch «Hulniach», ale ŭ razmoŭnym trylery jana vyhladaje troški kamična ŭ svaich pierapadach ad abyjakavaści da hieraizmu.

Kitnis razumieje, što jaje vykarystoŭvajuć jak zbroju ŭ infarmacyjnaj vajnie i daje na toje zhodu, kali paŭstancy vyratujuć zachoplenych Kapitolijem udzielnikaŭ apošnich Hulniaŭ. Pry naviedvańni razburanych dystryktaŭ jana ŭpadaje ŭ stupar ci ahresiju, ale niby zusim nie zaŭvažaje kamieraŭ, nakiravanych na jaje. Režysioram prapahandyskich rolikaŭ toje i treba, a voś u hledača ŭźnikajuć sumnievy.

Siabry Kitnis vyhladajuć navat horš.

Supravaždalnica Efi (Elizabet Benks), vymušanaja admovicca ad raskošy Kapitolija ŭ bunkiery, i nastaŭnik Chejmič (Vudy Charelsan), jakomu pryjšłosia kinuć pić praz adsutnaść u militarystaŭ ałkaholu, atrymali vyklučna kamiedyjnyja roli dy zhubili svaje hałoŭnyja pryvabnyja dla hledača rysy.

Najbolš pierakanaŭča hladzicca strateh Płutarch u vykanańni Filipa Chofmana. Aktor nie daje zasumniavacca, što jaho hieroj chitryć i robić usio tolki dziela dasiahnieńnia svaich metaŭ — dobra, što hetyja mety supadajuć z metami paŭstancaŭ. Škada tolki, što aktor nie dažyŭ da zaviaršeńnia zdymak. Zatoje pamier pa-halivudsku — ad pieradaziroŭki sumiesi hierainu, kakainu, amfietaminu i bienzadyjaziepinu. Tyja kadry, u jakich jon nie paśpieŭ źniacca, dapracavanyja kampjuternaj animacyjaj. 

Značna cikaviej u filmie vyhladaje Pit, zachopleny ŭ pałon dyktataram paplečnik Kitnis u vykanańni Džoša Chatčersana. U pieršych dvuch filmach jaho hieroj niby pryjšoŭ z vampirskaj sahi «Sutońnie», jon vyhladaŭ chlipkim bałastam, a ŭ luboŭnym trochvuholniku z Kitnis i jaje siabram Hiejłam (Lijam Chiemsvort) vyjhravaŭ u apošniaha tolki za košt abstavin. U «Sojcy» jamu taksama dastałasia rola achviary, ale rola bolš składanaja — ci toje chitraha zdradnika, ci toje zdradnika tolki praz katavańni, ci toje…

Tym, chto nie čytaŭ ramany, budzie nasamreč cikava daviedacca, kim Pita zrabili ŭ Kapitolii. Finał pieršaj častki «Sojki» atrymaŭsia dynamičnym i emacyjnym, pa-sapraŭdnamu strašnym.

Tolki što rabić bolš za dźvie hadziny da jaho — pytańniečka. Za ŭvieś film Kitnis tolki raz skarystajecca łukam pa bajavym pryznačeńni. Za ŭvieś film budzie tolki adna praciahłaja napružanaja scena — bambardyroŭka schovišča, adźniataja, pa praŭdzie, vielmi i vielmi jakasna.

Možna tolki dzivicca tamu, jak u zvyšpaśpiachovaha režysiora papiarednich «Hulniaŭ» (a taksama «Kanstantyna» i «Ja — lehienda») Frensisa Łoŭrensa atrymałasia nastolki ŭparta ŭsyplać metavuju aŭdytoryju. Vidać, u jaho nie było vybaru: treci i apošni raman Sjuzan Kolinz vyrazna raźbity na «razmovy» i «ekšn» u roŭnych dolach, a industryja patrabuje, jak toje ciapier modna, raźbić apošniuju častku epapiei na dva filmy.

Ź inšaha boku, «hutarkovy tryler» u jaho atrymaŭsia niebłahi.

Nie hienijalny, ź dzivosami ŭ hulni aktoraŭ, ale vydatnaj atmaśfieraj napružanaści i dekaracyjach to Fallout 3, to Half-Life 2. Jašče nie Chičkok, ale ŭžo nie «pra dyktaturu dla samych maleńkich» u žanry survival horror. Kali ŭžo praciahvać anałohii ź videahulniami, najbolš «Sojka» spadabajecca amataram «hutarkovaha ekšnu» Mass Effect.

Ciažej za ŭsich pryjdziecca pijarščykam — roŭna praz hod vyjdzie «Sojka-pieraśmiešnica, častka 2». Jak pierakanać hledačoŭ, što paśla «nudziaciny» budzie mnoha stralby i vybuchaŭ?

Jak nie rasčaravać tych, chto čakaje raźvićcia unutranaha śvietu hierojaŭ, a vymušany budzie pajści na maštabny bajevik? Možna chiba pasadzić na kresła režysiora Majkła Beja, śpiecyjalista pa batalijach i razbureńniach. Tady prynamsi možna zacikavić aŭdytoryju «Transformieraŭ», bo vialikuju častku aŭdytoryi «Hałodnych hulniaŭ» pieršaja častka «Sojki» rasčaruje.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?