Paśla praciahłych sprečak u Maskvie zarehistravali akcyjaniernaje tavarystva «ATŁK» (Abjadnanaja transpartna-łahistyčnaja kampanija) z statutnym kapitałam 39,7 młrd. rasijskich rubloŭ.
Nacyjanalnyja čyhunačnyja kampanii Rasii, Kazachstana i Biełarusi zaklučyli pahadnieńnie ab stvareńni ATŁK jašče ŭ červieni 2013 h. Płanvałasia, što kampanija zojmiecca pieravozkaj kantejniernych hruzaŭ u ramkach Jeŭrazijskaj ekanamičnaj prastory, u tym liku na tranzitnych maršrutach pamiž Jeŭropaj i Azijaj.
Zhodna ź biźnies-płanam da 2020 ahulny hruzazvarot ATŁK pieravysić 4 młn TEU, a dadatkovy dachod nacyjanalnych čyhunačnych kampanij ad vykarystańnia infrastruktury składzie kala 1,6 młrd dalaraŭ ZŠA. Kumulatyŭny ŭkład u VUP Biełarusi acentvajecca ŭ pamiery kala 1 młrd dalaraŭ.
U rynkavych umovach akramia chołdynhu ATŁK buduć dziejničać i pryvatnyja ŭdzielniki pieravozačnaha pracesu z Rasii, Biełarusi, Kazachstana, Kitaja, krain Jeŭrasajuza ale ekśpierty niepakojacca, što novastvoranaje akcyjaniernaje tavarystva moža ŭ pierśpiektyvie zachapić rynak čyhunačnych pieravozak.
Ad samaha pačatku ŭrad Rasii byŭ suprać parytetnaj schiemy kiravańnia Abjadnanaj transpartna-łahistyčnaj kampanijaj, stvaranaj Maskvoj, Astanoj i Minskam. Zaciahvańnie stvareńnia kampanii mahło być źviazana mienavita z tym, što RF nie zhadžałasia nadzialać BČ i KTČ roŭnymi paŭnamoctvami z RŽD.
Pieršapačatkova płanavałasia, što BČ i AT »Kazachstan Temir žały» buduć mieć u ATŁK doli ŭ 5% i 21% adpaviedna, pastupova naroščvajučy aktyvy. Dola AAT »RŽD »pavinna była skłaści 74%.
Kab stymulavać cikavaść da prajektu Biełarusi i Kazachstana. kiraŭnik rasijskaj čyhunki Uładzimir Jakunin nastojvaŭ na dasiahnieńni parytetu ŭ 2032 h.
Adnak Kreml vyrašyŭ inakš: asnoŭny kantrol nad ATŁK atrymała Rasija. Zasnavalnikami źjaŭlajucca AAT «Rasijskija čyhunki» z dolaj u statutnym kapitale 99,84%, Biełaruskaja čyhunka i AT »Nacyjanalnaja kampanija» Kazachstan Temir žoły» ź mikraskapičnymi 0,08%.
RŽD vykupić doli Kazachstana i Biełarusi ŭ ATŁK i stanie 100%-m akcyjanieram, kali partniory nie uniasuć aktyvy da 2017 h.
