Prablemu daminavańnia kampanii Google u internecie Jeŭrakamisija płanuje vyrašyć «adviazkaj pošuku ad inšych kamiercyjnych siervisaŭ», raspaviadaje Financial Times sa spasyłkaj na čarnavik zakonaprajekta.
Hałasavańnie pa dakumiencie pryznačanaje na čaćvier, 27 listapada. Jeŭrapiejskija zakony nie mohuć «razdialić» kampaniju ŭ pramym sensie, ale mohuć paŭpłyvać na pracu kampanii na terytoryi Jeŭropy.
Nietypovaje dla Jeŭraparłamienta vyrašeńnie padtrymlivajuć dva bujnyja błoki: sacyjalisty i Jeŭrapiejskaja narodnaja partyja. Pa mierkavańni Financial Times, da stvareńnia dakumienta padšturchnuła Hiermanija i ŭ pryvatnaści kamisar pa ličbavaj ekanomicy ES Hiunter Etynhier.
Etynhier krytykuje Google nie tolki za manapalisckuju palityku, ale i za adlustravańnie «pirackaha» kantentu, sumniajecca ŭ niejtralnaści pošukavaj vydačy i biaśpiecy ŭžyvańnia prahram Google u aŭtamabilach.
Kali zakon budzie pryniaty, u pošukavaj vydačy Google kampanija nie zmoža vystaŭlać svaje servisy vyšej za čužyja. Naprykład, kali siervis-pierakładčyk kankurentaŭ budzie lepšym i bolš papularnym za Google Translate, u pošukavaj vydačy kankurent musić być vyšej za ŭłasny siervis Google. Toje ž tyčycca prodažaŭ muzyki, kartahrafii i ŭsich inšych halinaŭ, u jakich Google prapanuje svaje pasłuhi.
Piać miesiacaŭ tamu Google pryznaŭ «prava być zabytym» — pa patrabavańni Jeŭrakamisii pošukavik dazvoliŭ jeŭrapiejcam vydalać z pošukavaj vydačy peŭnuju infarmacyju pra siabie. U lutym 2014 hoda Jeŭrakamisija i Google uzhadnili kampramisnyja prapanovy da kankurentaŭ kampanii, jakija ŭ 2010 hodzie inicyjavali «antymanapolnaje» rasśledvańnie.