Biełaruska-amierykanskaja kampanija EPAM adsudziła ŭ estonskich budaŭnikoŭ IDEAB kampiensacyju za niedabudavany dadatkovy ofis na terytoryi Parku vysokich technałohij, raspaviadaje CNews.
Kantrakt na budaŭnictva dadatkovaha budynka dla EPAM na sumu 17.2 młn dalaraŭ byŭ zaklučany ŭ kancy 2011 hoda. Zhodna ź im płanavałasia zbudavać pamiaškańnie ahulnaj płoščaj 14 tysiač m2. Terminy zdačy nieadnarazova pieranosilisia, apošni raz — na luty 2014 hoda.
Novy ofis EPAM dahetul nie zbudavany.
Zhodna sa spravazdačaj EPAM, u krasaviku 2014 hoda IDEAB spyniła budaŭnictva ź niezaležnych ad zamoŭcy pryčyn i paviedamiła ab niemahčymaści praciahu rabot. EPAM uziaŭ abjekt pad ułasny kantrol, razarvaŭ kantrakt i źviarnuŭsia z pozvami u Haspadarčy sud Minska suprać padradčyka.
Adna z pozvaŭ zadavolenaja na karyść EPAM: sud abaviazaŭ IDEAB vypłacić 1 młn dalaraŭ kampiensacyj EPAM. Tymčasam EPAM vypłočvaŭ estoncam u pracesie budaŭnictva 4,5 młn dalaraŭ avansaŭ na budmateryjały i na budučyja raboty. Častka vykananych rabot nie była ŭniesienaja ŭ akty, ale nakatoryja budmateryjały byli vykarystanyja.
Z ulikam hetaha EPAM aceńvaje svaje straty ŭ 2 młn dalaraŭ.
Usiaho ŭ prajekt było ŭkładziena, jak i mierkavałasia ŭ kantrakcie, 17.5 młn dalaraŭ. Ale dla zaviaršeńnia budaŭnictva spatrebicca jašče 7 młn dalaraŭ i prynamsi 10 miesiacaŭ rabot. Tymčasam zaklučany z uładami Biełarusi kantrakt, u miežach jakoha EPAM atrymaŭ ziamlu i padatkovyja palohki, praduhledžvaje zaviaršeńnie budaŭnictva ŭ kancy 2014 hoda.
IDEAB u svaju čarhu abvinavačvaje EPAM u zatrymkach płaciažoŭ i prypynieńni vypłat na hod padčas finansavaha kryzisu na Kipry. Kampanija miarkuje, što ŭviesnu EPAM zachapiŭ budaŭničuju placoŭku i budmateryjały, pry čym materyjały, što zakuplała IDEAB za svaje srodki, EPAM nie viarnuŭ. Zaprašeńnie na sud, na jakim było pryniataje vyrašeńnie ab kampiensacyi miljon dalaraŭ, kampanija nie atrymlivała, śćviardžajuć pradstaŭniki IDEAB.
Raniej IDEAB užo była abjektam raźbiralnictva adnosna budoŭli ŭ PVT.
U 2011 hodzie było zaklučanaje pahadnieńnie na budaŭnictva ofisa «IT-Park» koštam 30 młn dalaraŭ. Raboty taksama dahetul nie zavieršanyja. IDEAB vyjhrała raźbiralnictva ab viartańni budmateryjałaŭ, ale acaniła straty 3 młn dalaraŭ i vyrašyła pakinuć biełaruski rynak.
