Sprava ab napadzie na dvuch piensijanieraŭ u rajonie parku Horkaha ŭ Minsku, pa jakim pryznali vinavatymi troch studentaŭ jurydyčnaha kaledža, adpravili na novy razhlad u sud Partyzanskaha rajona. Adpaviednaje rašeńnie pryniała 24 listapada kalehija Minskaha haradskoha suda, razhledzieŭšy kasacyjnuju skarhu.
U bližejšy čas budzie vyzvaleny z-pad varty Alaksandr Hajduk, jaki raniej byŭ prysudžany da piaci z pałovaj hadoŭ kałonii ŭzmocnienaha režymu i pakul znachodzicca ŭ SIZA na Vaładarskaha. Sudździa pryniała rašeńnie źmianić jamu mieru strymańnia na padpisku ab niavyjeździe.
Padtrymać studentaŭ u zału suda pryjšli ich rodnyja i adnahrupniki, paciarpiełych u zale nie było.
Troch studentaŭ jurydyčnaha kaledža pryznali vinavatymi ŭ tym, što ŭ sakaviku 2014 h. jany źbili dvuch piensijanieraŭ. Alaksandr Hajduk byŭ prysudžany da piaci z pałovaj hadoŭ ŭzmocnienaha režymu za naniasieńnie ciažkich cialesnych paškodžańniaŭ.
Dvoje inšych chłopcaŭ byli pryznanyja vinavatymi ŭ hrupavym chulihanstvie. Jaŭhiena Krupkieviča prysudzili da dvuch z pałovaj hadoŭ umoŭna. Da treciaha, Eduarda, užyli amnistyju, bo jon jašče niepaŭnahadovy. Taksama chłopcaŭ abaviazali kampiensavać maralnuju škodu ŭ pamiery 2 młn rubloŭ.
Usie troje nastojvajuć na svajoj nievinavataści. Dokazami viny ŭ hetaj spravie stali niekalki abstavinaŭ: apaznańnie Jaŭhiena Krupkieviča i Alaksandra Hajduka adnym z dvuch paciarpiełych, apaznańnie hetych ža chłopcaŭ adnym z dvuch śviedkaŭ-vidavočcaŭ i videazapis. Na videa zafiksavana, što troje chłopcaŭ iduć u niekalkich sotniach mietraŭ ad miesca zdareńnia prykładna ŭ toj čas, kali na paciarpiełych byŭ ździejśnieny napad.
«Inšych dokazaŭ dačynieńnia studentaŭ da złačynstva ŭ spravie prosta niama», - źviartaŭ uvahu advakat Raman Julski.