Ministr abarony Złučanych Štataŭ Čak Chiejhieł padaŭ u adstaŭku sa svajoj pasady.
Jak paviedamlajecca, prezident ZŠA Barak Abama pryniaŭ adstaŭku ministra.
68-hadovy Čak Chiejhieł, vieteran vajny ŭ Vjetnamie, staŭ ministram abarony ZŠA ŭ 2013 hodzie. Jon byŭ adzinym pradstaŭnikom Respublikanskaj partyi ŭ siłavym błoku prezidenta Abamy.
Hazieta New York Times paviedamiła, što jon padaŭ u adstaŭku paśla źmieny stratehii Vašynhtona ŭ chodzie baraćby z džychadysckaj hrupoŭkaj «Isłamskaja dziaržava».
Chiejhieł budzie praciahvać vykonvać abaviazki ministra abarony da pryznačeńnia svajho pierajemnika.
Krytyk vajny ŭ Iraku
Jak čakajecca, prezident Abama aficyjna abjavić pra jaho adstaŭku ŭ bližejšy čas.
Nienazvany pradstaŭnik administracyi prezidenta paviedamiŭ ahienctvu Asašyejted pres, što Abama i Chiejheł pryjšli da ŭzajemnaj zhody ŭ tym, što nastaŭ čas dla źmieny kiraŭnika Pientahona, i ŭžo niekalki tydniaŭ abmiarkoŭvali hety krok.
Čak Chiejhieł, u minułym sienatar-respublikaniec ad štata Niebraska, u svoj čas vystupaŭ z vostraj krytykaj amierykanskaj interviencyi ŭ Iraku, niahledziačy na toje, što sam prahałasavaŭ za ŭvod tudy amierykanskich vojskaŭ.
Jon źmianiŭ na pasadzie ministra abarony Leona Panietu padčas druhoha prezidenckaha termina Baraka Abamy. Siarod jaho zadač byli vyvad amierykanskich vojskaŭ z Afhanistana i ahulnaje zrušeńnie aktyŭnaści Pientahona na azijacki rehijon.
Ale ŭ chodzie apieracyj Pientahona suprać «Isłamskaj dziaržavy» ŭ Iraku i Siryi ahulnaja stratehija ZŠA ŭ hetym rehijonie źmianiłasia.
Jak čakajecca, Abama nie nazavie pierajemnika Chiejhieła ŭ paniadziełak. Kali kandydat na pasadu ministra abarony budzie nazvany, jon pavinien budzie zaručycca padtrymkaj sienata.
