Prezidenta Litvy Dalu Hrybaŭskajcie moža čakać los byłoha hruzinskaha lidara Michaiła Saakašvili ŭ suviazi ź jaje vykazvańniami ŭ adras Rasiei, ličyć staršynia Dziarždumy Siarhiej Naryškin.
Kamientujučy žurnalistam prapanovu deputataŭ ad frakcyi KPRF razarvać adnosiny ź Litvoj za toje, što Hrybaŭskajcie nazvała RF «terarystyčnaj dziaržavaj», Naryškin nazvaŭ słovy litoŭskaha prezidenta «hrubym antyrasiejskim zajavaj», pieradajuć rasijskija infarmacyjnyja ahienctvy.
Nahadajem, što prezident Litvy rezka acaniła rolu Rasii va ŭkrainskim kryzisie ŭ intervju Litoŭskamu radyjo 20 listapada.
Naryškin uzhadaŭ Michaiła Saakašvili. «Dzie jon siońnia? Jon siońnia izhoj ŭ Hruzii, i jamu nichto ruki nie choča padać», — acaniŭ śpikier ciapierašniaje žyćcio Saakašvili.
Karjera Saakašvili pajšła na spad paśla taho, jak Hruzija nie zdoleła strymać rasijskija vojski ŭ karotkaj vajnie 2008 hoda.
Jak paviedamlałasia, paśla adstaŭki hruzinski palityk žyvie ŭ ZŠA. Na radzimie novy ŭrad dabiŭsia zaviadzieńnia na jaho kryminalnaj spravy — jaho abvinavačvajuć u pieravyšeńni słužbovych paŭnamoctvaŭ i rastracie dziaržaŭnych srodkaŭ.
Surova krytykujučy Hrybaŭskajcie, Naryškin ŭ toj ža čas nie padtrymaŭ prapanovy ab razryvie dypłamatyčnych adnosin ź Litvoj. Zatoje jon prapanavaŭ vyhnać ZŠA z NATA.
U ramkach dyskusii na mižnarodnym kruhłym stale na temu «Šlachi pieraadoleńnia kryzisu ŭ Jeŭropie» Naryškin vystupiŭ ź niečakanaj zajavaj: «U mianie jość fantastyčnaja prapanova: ja b prapanavaŭ jeŭrapiejskim partnioram vyhnać z błoka ZŠA». «I ja ŭpeŭnieny, što ŭzrovień stabilnaści i biaśpieki ŭ Jeŭropie davoli chutka vierniecca ŭ naležny stan», — dadaŭ śpikier Dziarždumy.
Jak i Pucin, Naryškin — vychadziec z KHB.
Ź Litvy paviedamlajuć, što rasijskija pamiežniki ŭ Kalininhradskaj (Karalavieckaj) vobłaści pačali nadhladać litoŭski transpart pa ŭzmocnienaj pracedury. Vilnia zajaviła ŭ suviazi z hetym pratest pasłu Rasii. A Hrybaŭskajcie zaklikała litoŭskich biznesoŭcaŭ «acanić ryzyki» pracy na rasijskim rynku.
Niahledziačy na sankcyi, uviedzienyja Maskvoj suprać litoŭskich sielhaspraduktaŭ, Litva davoli ŭpeŭniena pačuvajecca ŭ adnosinach z Rasijaj, bo «Hazprom» nie moža pierakryć joj haz — nitka ŭ Kalininhrad idzie praź Litvu. Na vypadak ža krytyčnych situacyj Litva pieršaj u rehijonie pastaviła ŭ Kłajpiedzie terminał dla atrymańnia zvadkavanaha hazu. Jana ŭ hetym apiaredziła navat Polšču.
Dala Hrybaŭskajcie — adziny lidar u Jeŭrasajuzie, jaki publična zaklikaje da pastavak zbroi ŭkrainskaj armii. Palityčny styl Hrybaŭskajcie adroźnivajecca rezkaściu. U svoj čas jana adzinym ź lidaraŭ rehijona raskrytykavała administracyju Abamy za admovu ad raźmiaščeńnia va Uschodniaj Jeŭropie sistemy procirakietnaj abarony, čym vyklikała vialikaje razdražnieńnie ŭ Vašynhtonie. Taksama jana pajšła na asabistyja kantakty z Alaksandram Łukašenkam, kali paličyła, što toj uziaŭ kurs na ŭmacavańnie niezaležnaści Biełarusi.
