Hieroj «Bajcoŭskaha hienu» Vital Hurkoŭ praciahvaje svaimi spravami stvarać novyja i novyja infarmacyjnyja nahody. U pačatku vosieni stała viadoma pra toje, što jon uvajšoŭ u skład hurta Brutto. Pry hetym praśpiavaŭ u pieršym albomie kalektyvu dva biełaruskamoŭnyja treki i ŭžo aktyŭna hastraluje.
Pra ŭdzieł u Brutto čempijona śvietu pa muaj-taj šmat napisana i absmaktana na forumach dy ŭ sacsietkach. Paŭtaracca nie budziem. Zadamo Vitalu tyja pytańni, na jakich mała dzie rabilisia akcenty. Naprykład, ci zastaniecca jon u prafiesijnym sporcie.
— Nasamreč z muaj-taj ja nie zaviazaŭ i praciahvaju treniravacca, — supakojvaje Vital. — Pakul heta ŭdajecca spałučać. Nakolki heta budzie atrymlivacca praz hod, dva, try — pabaču. Ale sychodzić nie płanuju. Sport — heta vialikaja častka majho žyćcia, i jość žadańnie praciahvać. U sakaviku budzie čempijanat Biełarusi, dalej — čempijanat Jeŭropy, čempijanat śvietu. Pa prafiesijnych bajach pakul płanaŭ niama. Ja pierajšoŭ u bolš ciažkuju vahavuju katehoryju. Navat kali ja vystupaŭ u 70 kh, bajoŭ było niašmat. Heta praz toje, što nie mieŭ mieniedžara, jaki b rabiŭ prapanovy pa prafiesijnych turnirach. Amal usie surjoznyja bai — heta byli maje ŭłasnyja kantakty.
— U prafiesijnym muaj-taj, jak kažuć, kožny boj moža stać apošnim. Ci pahodziciesia vy ŭ siońniašnich umovach vystupać suprać samych topavych bajcoŭ?
— Tak. Dla hetaha mnie patrebna čatyry tydni padrychtoŭki, kab ja vyjšaŭ na pik formy. Prytym što siońnia ja praciahvaju treniravacca i režymić.
— Ci jość na budučyniu jašče niejkija asablivyja ŭmovy dla vialikich bajoŭ?
— Čas, miesca, hanarar. Usio.
Pra hurt Brutto: prafiesijnyja muzyki, spartoŭcy, ekanamisty i režysior
U prajekcie «Kultura palapšaje žyćcio» ŭvaha na tym, što Vital Hurkoŭ ź junactva hraŭ i śpiavaŭ u raznastajnych hurtach, užo akcentavałasia. Dy nie ŭsie pra heta viedajuć. Paśla stvareńnia BRUTTO internet-troli abrynulisia na čempijona z krytykaj, maŭlaŭ, dobra možna rabić tolki adnu spravu. Ale hurt za niekalki miesiacaŭ staŭ samym raskručanym u Biełarusi i pačaŭ davać paśpiachovyja žyvyja kancerty za miažoj. Na spravie akazałasia, što ŭ Brutto praktyčna ŭsie — prafiesijnyja muzyki. Nu a pra bijahrafiju mastackaha kiraŭnika Siarhieja «Sergio Brutto» Michałka i tak viedaje kožny.
— Chaču adrazu raściarušyć mif pra «kačkoŭ» i «śpiavajučych hantelaŭ», — praciahvaje Vital Hurkoŭ. — Raskažu pra našych chłopcaŭ. Dynia i Šurup — muzyki z rytm-siekcyi — majuć dobruju muzyčnuju adukacyju, pierajhrali ŭ šmat jakich prafiesijnych hurtach. U tym liku i ŭ «Lapisie Trubiackim». Paša «Rude Boy» Traćciak — multyinstrumientalist, jakoha ŭ svoj čas uziali ŭ Akademiju muzyki biez ekzamienaŭ. U nas jon hraje na kłavišach, hitary i mandalinie. Łeft — heta viadomy andehraŭnd-dziejač i kłasny hitaryst z Ukrainy, jaki ŭ siabie doma ŭdzielničaŭ u topavych chardkor-hurtach. U Łefta vyšejšaja ekanamičnaja adukacyja. Da taho ž jon maje dypłom, jaki daje prava vykładać anhielskuju movu ŭ VNU. Piecia «AIST» taksama z Adesy.
— Dziŭnaja mianuška dla ŭkrainca.
— Kali jon pryjechaŭ u Biełaruś, to pieršaje, što jamu spatrebiłasia, — heta rovar AIST. Jaho ździviła, što ŭ nas nielha nabyć hety aparat u starym kuzavie, skažam tak. A jon pryzvyčaiŭsia na im jeździć u Adesie i vielmi sumavaŭ. Za heta my jaho prazvali AIST. Piecia skončyŭ Adeskuju mastackuju vučelniu pa śpiecyjalnaści śpievy, taksama hraŭ u roznych hurtach na bubnach. To bok raniej da muzyki nie mieli prafiesijnaha dačynieńnia tolki ja i Braził. Ale i my zaŭždy byli kala našaj chardkor-sceny. Ja nasamreč uvieś čas zajmaŭsia tvorčaściu, ale tady heta nie vylivałasia ŭ niešta surjoznaje.
— Pra Braziła viedajem, što jon praśpiavaŭ pieśniu «Hiry». Bolš ničoha.
— U minułym žyćci jon pracavaŭ ekanamistam u banku. U halinie sportu Braził siońnia zajmajecca źmiašanymi adzinaborstvami. Tapor — biźniesoviec i režysior.
Jon zdymaŭ klip «Anderdoh», braŭ udzieł u zapisie alboma. To bok ludzi sabralisia daloka nie durnyja.
— Nie paspračaješsia. Voś jašče što cikava: dzie rabili firmovy huk dla Brutto?
— Albom zapisaŭ biełarus Andrej «Babior» Babroŭka. Zvodzić i majstaryć dasłali ŭ ZŠA da krutych chłopcaŭ. Jany dvojčy pieraroblivali, ale vynik nie zadavoliŭ. Tamu Babior sam usio źvioŭ i dasłaŭ amierykancam na majstarynh. Akazałasia, što naš biełarus — topavy hukarežysior. Tamu sinhł «ADIDAS» jaho paprasili zrabić samastojna. U albomie, darečy, usio vysłuchoŭvali miljon razoŭ, praličvali kožny momant. Ad niekatorych słuchačoŭ byli kamientary, nibyta dzieści niedaskanała praśpiavali. Jak razumiejecie, majučy taki mahutny kaściak muzykaŭ, niedakładnaści možna było vypravić umomant. Ale heta byŭ naŭmysny mastacki pryjom. U niejkich momantach naš imidž mnohija pryniali za čystuju manietu. Ale ŭ mastactvie nie ŭsio tak prosta.
Pra skandalny sinhł «ADIDAS»: Art-pravakacyja dapamahła rasstavić pryjarytety: chto dalej idzie razam z nami
Pieršy žyvy kancert Brutto dali ŭ siaredzinie listapada ŭ Krasnadary. Za niekalki dzion da hetaha Vital Hurkoŭ pravioŭ tam svoj bajcoŭski sieminar.
— Miarkujučy pa fotazdymkach, ludziej pryjšło vielmi šmat. Chto arhanizavaŭ majstar-kłas? Što tam adbyvałasia?
— Prezident Fiederacyi tajskaha boksa Rasii daviedaŭsia ab maim padarožžy ŭ Krasnadar. Jon prapanavaŭ pravieści šerah navučalnych zaniatkaŭ u tych haradach, kudy my pajedziem z kancertami. Sieminar prachodziŭ u novym, vielmi sučasnym i firmovym kłubie. Ździviła, što tudy pryjšło kala 150 čałaviek, kab pahladzieć na mianie jak na spartoŭca, jaki pakinuŭ śled u muaj-taj. Byli ludzi z usiaho Krasnadarskaha kraju, a taksama z Rastova i navat ź Sibiry. Pałova prosta fatahrafavałasia i hutaryła. Inšyja ŭdzielničali ŭ zaniatkach. Byli i darosłyja mužčyny, i dziaŭčaty, i junijory. Darečy, u hetym kłubie da mianie pravodziŭ sieminar lehiendarny baksior Roj Džons. Ja taksama adčuŭ siabie Rojem Džonsam, bo tak šmat aŭtohrafaŭ nikoli nidzie nie davaŭ.
— Kali vyjšaŭ sinhł «ADIDAS», jon mnohich ahałomšyŭ. Mabyć, niekatoryja słuchačy pakryŭdzilisia.
— Pieršy albom «UNDERDOG» i sinhł «ADIDAS» — heta była art-pravakacyja, častka našaha płanu. U niejkim sensie my chacieli zakranuć publiku, jakaja jenčyła pra «Lapisa Trubiackoha» na forumach i ŭ sacsietkach. Heta jak Muchamied Ali zadziraŭ svaich apanientaŭ pierad bojem. Jon moh kazać niepryjemnyja rečy, kab vyvieści sapiernika z raŭnavahi, ale tym samym pryciahvaŭ uvahu publiki. Taksama naša pazicyja dapamahła rasstavić pryjarytety — chto dalej idzie razam z nami. Brutto — novy hurt i nie treba atajasamlivać jaho ź minułym i puskać sopli. Heta byŭ adkaz ludziam, jakija mohuć tolki p……. i zajaŭlać pra namiery, ale ničoha vartaha nie robiać. A ŭ BRUTTO abjadnalisia ludzi, jakija ŭvieś čas znachodziacca ŭ viry dziejnaści, šmat pracujuć i vydajuć pradukt. Stavim zadačy i ich dasiahajem. Tyja, chto pakryŭdziŭsia, — ź imi nam, peŭna, nie pa darozie. Meta była hetych ludziej spravakavać i prymusić dumać.
— Cikava, a što vy dumajecie pra našu viečnuju mientalnuju prablemu? Što ŭ Biełarusi mała prastory dla manieŭraŭ i realizacyi. Vy startavali z usimi ŭ adnolkavych umovach, ale strelnuli i ŭ muzycy, i ŭ sporcie.
— Pavinnaja być ułasnaja matyvacyja čymści zajmacca i niešta źmianić pierš-napierš u sabie. Pa vialikim rachunku, bolš vam nichto nie dapamoža. Treba adšukać svoj źnič, jaki paviadzie napierad.
