Žurnalistku-fryłansiera Tamaru Ščapiotkinu ź Biarozy vyklikajuć u milicyju. Pa słovach pravaachoŭnikaŭ, 27 listapada joj budzie ŭručana pozva ŭ sud. Jak paviedamili žurnalistcy supracoŭniki milicyi, pozva źviazana ź jaje mierkavanym supracoŭnictvam z «Biełaruskim Radyjo Racyja» - zamiežnym ŚMI, jaki nie maje akredytacyi ŭ Biełarusi.
– Mnie patelefanavaŭ namieśnik načalnika adździełu achovy hramadskaha paradku našaj miascovaj milicyi i skazaŭ, što ja pavinna siońnia źjavicca da ich pa pryčynie taho, što pracuju na «Biełaruskim Radyjo Racyja». Mnie paviedamili, što chočuć uručyć pozvu ŭ sud. Z-za taho, što siońnia ja mieła inšyja płany, milicyjanty majuć namier uručyć mnie pozvu ŭ sud u čaćvier, – raspaviała Tamara Ščapiotkina.
Sama žurnalistka ličyć, što jaje telefon pilna prasłuchoŭvajecca supracoŭnikami Kamiteta dziaržaŭnaj biaśpieki. Na jaje dumku, KDB i arhanizavaŭ pieraśled. Apošnim časam žurnalistka zaŭvažyła, što litaralna pa jaje śladach chodziać ludzi ŭ cyvilnym, jakija zapytvalisia ŭ hierojaŭ jaje žurnalisckich materyjałaŭ pra toje, jak jana pradstaŭlałasia i pra što pytałasia ŭ surazmoŭcaŭ u časie intervju.
Pa padlikach HA «Biełaruskaja asacyjacyja žurnalistaŭ», heta ŭžo trynaccataja padobnaja sprava za hod.
Ciaham apošnich miesiacaŭ supracoŭniki milicyja raspačynali administratyŭnyja pracesy pa artykule 22.9 suprać žurnalistaŭ Alesia Dzianisava, Alesia Zaleŭskaha (2 spravy),Andreja Mialeški (3 spravy), Alaksandra Burakova (2 spravy), Michaiła Aršynskaha,Maryny Maŭčanavaj, Vitala Siamaški i Aliny Litvinčuk. Bolšaść žurnalistaŭ byli pakaranyja vialikimi hrašovymi štrafami.
Nahadajem, što pradstaŭnica ABSIE pa pytańniach svabody ŚMI Dunia Mijatavič jašče ŭ červieni h.h. vykazała zaniepakojenaść z nahody pavieličeńnia kolkaści štrafaŭ biełaruskim žurnalistam za pracu biez akredytacyi. Jana painfarmavała, što 5 červienia napisała ministru zamiežnych spraŭ Uładzimiru Makieju list, padkreśliŭšy nieabchodnaść pierahledzieć patrabavańni akredytacyi žurnalistaŭ. Pačas svajho aficyjnaha vizitu ŭ Minsk 15-16 vieraśnia 2014 h. jana taksama akcentavała ŭvahu na nieabchodnaści naohuł admianić abaviazkovuju akredytacyju.
