Alaksandra Łukašenku zasmučajuć pavodziny Rasii adnosna abmiežavańnia pastavak biełaruskaj pradukcyi. Ab hetym kiraŭnik dziaržavy zajaviŭ 27 listapada na sustrečy z hubiernataram Sankt-Pieciarburha Hieorhijem Pałtaŭčankam, paviedamlaje jaho pres-słužba.
«Mianie siońnia pavodziny rasijskich uład nie prosta ździŭlajuć, a zasmučajuć. Kali ŭ bližejšy čas nie budzie narmalizavany handal pamiž dźviuma krainami, my vymušany budziem reahavać. Što heta za pavodziny takija?!» — adznačyŭ biełaruski lidar.
«I prytym, viedajecie, što kryŭdzić? Voś uźniknuć prablemy ŭ Kazachstana, dapuścim, i Biełarusi adnolkavyja — adzin zvanok, i ŭsio dobra z Kazachstanam. U mianie stvarajecca ŭražańnie, što na prykładzie Biełarusi čarhovy raz, uziaŭšysia to za hazavuju trubu, to za naftavuju, a ciapier za praduktovyja pytańni, chočuć pakazać kamuści abo ŭsiamu śvietu, pravučyć niekaha. Ale my ž nie ščaniaty, kab nas za škirku vadzić, vybačajcie, za hetu hrubaść», — skazaŭ kiraŭnik dziaržavy.
Pasoł Rasii ŭ Biełarusi Alaksandr Surykaŭ zaŭvažyŭ, što ŭ hetaj situacyi treba sieści i damovicca.
«Heta načysta admiatajecca z rasijskaha boku. Tre' było ŭčora Siamašku sustrecca z Dvarkovičam, kab namiecić niejkija šlachi. Ale ŭ nas jość zakon, mytnyja pahadnieńni, my zaŭtra pačynajem rabotu ŭ Jeŭrazijskim ekanamičnym sajuzie. Jakija mohuć być pieraškody ŭ pastaŭkach tavaraŭ?!» — skazaŭ Łukašenka. Jon nahadaŭ, što baki damovilisia, što pavinna być pramoje bieśpieraškodnaje pieramiaščeńnie tavaraŭ, hruzaŭ, rabočaj siły. «My faktyčna adna kraina. Navošta vy heta robicie?» - skazaŭ kiraŭnik biełaruskaj dziaržavy.
«Kali vy ličycie, što my niešta parušyli, my ž biez usiakich skandałaŭ možam razabracca ŭ hetym», — dadaŭ biełaruski lidar.
Alaksandr Łukašenka padkreśliŭ, što ŭziaŭ hetyja pytańni na kantrol. «Try miesiacy my na heta nie reahavali — baču, što pytańni nie vyrašajucca, — adznačyŭ jon. — Nie treba nas presinhavać. My byli vam nadziejnymi siabrami i budziem. Ale kali vy nas pačniacie ščymić, vy viedajecie, što ja ciarpieć nie budu».
«I potym, ja nie razumieju: vy što, śpiecyjalna heta robicie, kab uźniać ceny ŭ Rasijskaj Fiederacyi? My ž pastaŭlajem vam pradukcyju pa samych nizkich cenach. Ale deficyt tavaraŭ, asabliva miasnoj pradukcyi na rynkach Rasii, — heta ž rost cen. Navošta vy heta robicie? Mnie naohuł heta nie zrazumieła», — adznačyŭ jon.
«Prytym nam kažuć adkryta, što my pierapracoŭvajem syravinu, kuplajem štości na Zachadzie. Ale my damovilisia z prezidentam Rasii i z premjeram, što heta nie jość parušeńnie embarha, — pradoŭžyŭ biełaruski lidar.
— Što hrachu taić, siońnia, kali ŭ ich (na Zachadzie) uźnikli prablemy, asabliva ŭ susiedziaŭ, jany hatovy pa źnižanych cenach hetu syravinu addavać. I dziakuj. 100 młn zarobić Biełaruś na praciahu hoda — heta što, hrošy? I heta što, drenna?»
Alaksandr Łukašenka źviarnuŭ uvahu, što Biełarusi treba viartać kredyty Rasii. «Pucin kaža: vam nichto nie pieraškadžaje, pierapracoŭvajcie syravinu, ale pramoha tranzitu nie pavinna być. Dajšli da taho, što pastavili ŭ Manholiju partyju tavaru, a dzieści ŭ Buracii viarnuli tavar nazad. Ale heta ž pastaŭki ŭ Manholiju. Pastaŭlajuć u Kazachstan. Rasijanie: u nas naściarožanaść, što z Kazachstana zaviazuć u Rasiju. Dyk vy kantralujcie kazachaŭ, kab jany nie zavieźli», — adznačyŭ jon.
«Ja nie razumieju, što adbyvajecca, navošta heta treba? — pradoŭžyŭ jon. — My try miesiacy moŭčki sprabavali štości zrabić. Ruchu nijakaha niama. My ž ruskija ludzi i pavinny dahavorvacca».
«Kali chtości z vašych choča pahreć ruki na situacyi, uźniać canu, to heta nie naša pazicyja. My narody pavinny abaraniać. Siońnia rasijanam nialohka, ceny ŭźnimajucca kožny dzień, — adznačyŭ Łukašenka. — U Novasibirsku ŭźnikła prablema z hrečkaj. Jość u nas mahčymaść — 120 t u Novasibirsk imhnienna adpravim. My starajemsia vyrašać vašy prablemy, a vy pačynajecie nas dušyć. Nielha tak rabić».
Alaksandr Łukašenka padkreśliŭ, što Biełaruś starajecca dapamahčy źbić canu na tavary ŭ Rasii, prapanujučy bolš tannuju biełaruskuju pradukcyju. Jon paraiŭ rasijskamu boku razabracca «z roznym žullom, jakoje na hetym žyruje, z handlarami i inšymi».
«Nam treba ŭstaraniać usialakija barjery. Siabroŭ u nas u śviecie vy viedajecie kolki. I vy viedajecie, jakaja pazicyja ŭ inšych dziaržaŭ. Tamu davajcie nie stračvać plačo adzin adnaho», - padkreśliŭ biełaruski lidar.
«Nie treba dumać, što Biełaruś mienšaja, čym Rasija, i jana ni na što nie zdolnaja. My vielmi navat mnohaje možam.
I my nikoli nie kidali Rasiju. Nie kiniem i ŭ hetaj situacyi.
My na hetym sabie karyść šukać nie majem namieru. Heta naša Rasija, i my jaje budziem abaraniać, jak svaju terytoryju», - skazaŭ Alaksandr Łukašenka.
