Prakuratura Homielskaj vobłaści nakiravała ŭ sud kryminalnuju spravu pavodle abvinavačańnia 45-hadovaj žančyny va ŭčynieńni zamachu na zabojstva, naŭmysnaha zabojstva i inšych ciažkich złačynstvaŭ.
Jak paviedamiŭ staršy pamočnik prakurora Homielskaj vobłaści Nadzieja Samusieva, abvinavačanaja nidzie nie pracuje, nie maje peŭnaha miesca žycharstva, raniej nieadnarazova sudzimaja. Spačatku jana zavałodała bankaŭskaj kartkaj, što naležyć znajomaj, jakaja časova pasialiła jaje ŭ svajoj kvatery, i, daviedaŭšysia pin-kod, u lutym 2014 hoda nieadnarazova vykradała hrošy praz bankamaty Homiela. Jana naniesła škodu paciarpiełaj na 1,7 młn. rubloŭ.
Na rachunku abvinavačanaj i inšyja złačynstvy, u tym liku asabliva ciažkija. Tak,
u kvatery žychara Homiela paśla sumiesnaha raśpivańnia śpirtnoha jana naniesła jamu rany kuchonnym nažom, adkryła harełki hazavaj plity, kab vyklikać vybuch i pažar, zamknuła ŭvachodnyja dźviery kvatery zvonku na zamok i ŭciakła, vykraŭšy 1 młn. rubloŭ.
Mužčyna, kali aprytomnieŭ, paśpieŭ zakryć harełki plity i pravietryŭ pamiaškańnie, praduchiliŭšy vybuch hazu.
Praź niekalki dzion žančyna z metaj zavałodańnia majomaściu ŭčyniła naŭmysnaje zabojstva jašče adnaho mužčyny ŭ jaho kvatery, naniesła jamu koluča-režučym pradmietam mnostva ŭdaraŭ u žyćciova važnyja orhany, ad čaho toj pamior na miescy zdareńnia.
«Nanosiačy šmatlikija ŭdary nažom, abvinavačanaja nie mahła nie ŭśviedamlać, što dastaŭlaje paciarpiełamu asablivyja pakuty. Paśla ŭčynieńnia zabojstva jana vykrała i vyniesła z kvatery impartny televizar koštam zvyš 4 młn. rubloŭ», — zaznačyła Samusieva.
Raniej, u 2011 hodzie, za ŭčynieńnie ŭ hetaj ža kvatery rabavańnia z prymianieńniem hvałtu, nie niebiaśpiečnaha dla žyćcia ci zdaroŭja paciarpiełaha, žančyna była asudžanaja na try hady pazbaŭleńnia voli.
U vyniku rasśledavańnia kryminalnaj spravy žančynie vystaŭlenaje abvinavačvańnie ŭ kradziažy hrošaj šlacham niesankcyjanavanaha dostupu ŭ kamp`iutarnyja sistemy bankamataŭ, a taksama ŭ zamachu na naŭmysnaje zabojstva ahulnaniebiaśpiečnym sposabam, naŭmysnaje źniščeńnie ci paškodžańnie majomaści ahulnaniebiaśpiečnym sposabam, tajnym vykradańni hrašovych srodkaŭ i naŭmysnym supraćpraŭnym pazbaŭleńni žyćcia z asablivaj žorstkaściu, źviazanym z razbojem.
