Namieśnik premjer-ministra Michaił Rusy daručyŭ pravieryć fakty samavolnaha zaniaćcia ziamiel pad Minskam. Takoje daručeńnie jon daŭ siońnia na pasiadžeńni Minabłvykankama, dzie razhladalisia vyniki sacyjalna-ekanamičnaha raźvićcia vobłaści za dzieviać miesiacaŭ biahučaha hoda.
«Treba navieści paradak na terytoryi vakoł Minska. Pačali raźbiracca z roznymi słužbami — usie kivajuć adzin na adnaho. Prykłady — samavolny zachop učastka, samavolnaje budaŭnictva. Vykapali kanał, pabudavali prystań, i nichto hetaha nie bačyć»,
— padkreśliŭ vice-premjer.
Michaił Rusy akcentavaŭ uvahu, što apieratyŭnaje vyrašeńnie hetaha pytańnia, a taksama inšych prablem rehijona budzie zaležać ad uzroŭniu vykanalnickaj dyscypliny i adkaznaści kirujučych kadraŭ rehijona. Tak, u hetym płanie ciapier jość pretenzii da miasa-małočnaj haliny.
«Tam, dzie kiraŭnik pracuje ŭ patrebnym rečyščy, niama prablem ni z čym. Liču, što taja sistema raboty, jakaja vybudavana ŭ Minskaj vobłaści, daść mahčymaść vyrašyć usie pytańni, i ŭrad hatovy ŭ hetym dapamahčy. Kadry ŭ rehijonie jość, ź imi treba pracavać, nie bajacca prychodu maładych. Upeŭnieny, što pastaŭlenyja na 2015 hod zadačy vobłaść vykanaje»,
— skazaŭ jon.
Zakranajučy temu ekspartu pradukcyi ŭ Rasiju, Michaił Rusy adznačyŭ: «Tak, siońnia jość pytańni nakont kursa rasijskaha rubla. Ale pry hetym prodažy iduć, treba varušycca i aktyŭna zajmacca pastaŭkami». Jon akcentavaŭ uvahu, što pradpryjemstvy pry vypusku pradukcyi pavinny ŭ pieršuju čarhu źviartać uvahu na jaje zapatrabavanaść.
