Usie prablemy, što tyčacca pastavak biełaruskaha charčavańnia ŭ Rasiju i jaho tranzitu, Biełaruś raźličvaje źniać padpisańniem adpaviednych dakumientaŭ u Minsku 2 śniežnia.
Jak paviedamiŭ 28 listapada žurnalistam u pałacie pradstaŭnikoŭ vice-premjer Michaił Rusy, 1 śniežnia ŭ Minsk pryjeduć vieterynarnyja śpiecyjalisty z Rasii, Mižnarodnaha epizaatyčnaha biuro, Ukrainy, a taksama krain ES — Łatvii, Litvy, Polščy, Estonii.
Rusy taksama paviedamiŭ ab praviedzienych u Maskvie pieramovach ź vice-premjeram Rasii Arkadziem Dvarkovičam, kiraŭnikom Raśsielhasnahladu Siarhiejem Dankviertam i ministram sielskaj haspadarki RF Mikałajem Fiodaravym. Pavodle jaho słoŭ, padčas hetych sustreč było pryniataje rašeńnie «apieratyŭna stvaryć try hrupy śpiecyjalistaŭ», jakija raspracujuć šlachi vyrašeńnia prablem z tranzitam charčavańnia i pravierkaj jakaści tavaraŭ. «Z tym, jakuju kolkaść prob i ŭ jakim abjomie nieabchodna pradpryjemstva adbirać i nakiroŭvać u nas u krainie, a taksama ŭ Rasiju, kab nie ŭźnikali pytańni», — rastłumačyŭ Rusy.
Nahadajem, u listapadzie Rasija ŭviała zabaronu na ŭvoz miasnoj i małočnaj pradukcyi bujnych biełaruskich pradpryjemstvaŭ, rastłumačyŭšy heta jaje nieadpaviednaściu normam rasijskaha zakanadaŭstva.
Pieramovy ŭ Maskvie prajšli 26 listapada. Aprača pretenzij da jakaści biełaruskaj pradukcyi, rasijanie zajavili pra sumniŭnaść vieterynarnych siertyfikataŭ, vydadzienych na pradukcyju, jakaja pastupaje na terytoryju RF, a taksama vykazali zaniepakojenaść nakont farmiravańnia syravinnaj bazy biełaruskimi pierapracoŭčymi pradpryjemstvami. «Uličvajučy hetyja fakty, zastajecca adkrytym pytańnie ab dastatkovaj efiektyŭnaści pracy biełaruskaj dziaržaŭnaj sistemy kantrolu ŭ cełym», — paviedamiŭ pavodle vynikaŭ pieramoŭ Raśsielhasnahlad.
Rasijski bok prapanavaŭ pravieści sumiesnuju acenku dziejnaści biełaruskich łabaratoryj i navukovych ustanoŭ na pradmiet kvalifikacyi śpiecyjalistaŭ, asnaščanaści abstalavańniem i mietodyk, što vykarystoŭvajucca.
Biełaruskaja delehacyja vykazała zhodu pryniać rabočuju hrupu dla acenki sistemy dziaržaŭnaha kantrolu ŭ respublicy, paviedamiŭ Raśsielhasnahlad.
