Psaryjaz — heta chraničnaje zapaleńnie ŭčastkaŭ skury. Pa vialikim rachunku, nijakaha lačeńnia dahetul dla jaho nie było. Daktaram udavałasia tolki časova zdymać jaho prajavy. Miž tym kolkaść chvorych na jaho raście i raście.
Pačyrvanieńni, plaskatyja blaški, erozii i inšyja paražeńni — prajavy zapaleńnia skury mohuć być samyja roznyja. Da siońniašniaha dnia lekavać hetuju chvarobu najčaściej sprabavali supraćzapalenčymi srodkami: steroidami (harmanalnyja srodki, efiektyŭnyja, ale z proćmaj niepažadanych nastupstvaŭ lačeńnia) albo salicyłatami (svajakami viadomaj aceciłsalicyłavaj kisłaty).
Uličvajučy aŭtaimunnuju pryrodu zapaleńnia (cieła vypracoŭvaje antycieły da ŭłasnaj skury, imunnaja reakcyja vyklikaje chraničnaje zapaleńnie), lekary prymianiali mietatreksat (toj samy, jakim lečać lejkozy, atruta jašče taja), cykłasparyn A. Vytvornyja vitaminaŭ A i D stymulujuć utvareńnie na miescy blašak novaj skury.
Apošnim časam navukoŭcy, zdajecca, namacali inšy šlach. Raspracavany preparat uściekinumab (CNTO-1275) ad kampanii «Centocor Ortho Biotech», jaki błakuje vypracoŭku dvuch asnoŭnych miedyjataraŭ zapaleńnia skury: IL-12 i IL-23.
Pa sutnaści hety preparat — čałaviečyja antycieły (imunahłabuliny) ź nizkaj imunahiennaściu. Preparat uvodziać pad skuru na pieršym, čaćviertym, a nadalej — na kožnym dvanaccatym tydni lačeńnia. U vyniku adnaŭlajeccca jakaść žyćcia ŭ 56% chvorych, i ŭžo na dvanaccatym tydni lačeńnia ŭ 3—4 razy źmianšajecca płošča paražeńnia.
Kambinacyja kalcypatryjołu (preparat vitamina D3) i betamietazonu (steroid) na asnovie stearyłavaha efiru (padvyšaje pranicalnaść skury) — Dajvabet (kampanija «Nikamied») — vykarystoŭvajecca jak miascovy srodak. U takoj kambinacyi bijadastupnaść i efiektyŭnaść kampanientaŭ vyšejšaja, čym paasobku. Šlacham daśledavańniaŭ dakazana biaśpiečnaść vykarystańnia preparatu ciaham hoda paŭtornymi kursami. Pamianšeńnie płoščy vysypańniaŭ ŭ 3—4 razy dasiahałasia ŭžo na 4-m tydni vykarystańnia, efiekt zachoŭvaŭsia na praciahu hoda (pry prymianieńni Dajvabeta karotkimi kursami).
U listapadzie 2013 hoda Amierykanskaja asacyjacyja farmaceŭtaŭ prezientavała preparat Dual-F-NALP — srodak, jaki pranikaje z pavierchni skury ŭ hłybokija płasty, dziakujučy admysłovym malekułam lipidaŭ, i tam błakiruje miedyjatary zapaleńnia.
Paśpiachovyja vyprabavańni na myšach pakazali, što ŭsie vysypańni sa skury źnikali ŭžo na piaty dzień. Čakajem vynikaŭ.
