Skandalny amierykanski akcior Šaja Łabaf, jaki palubiŭsia hledačam paśla filmaŭ «Transformiery», «Nimfamanka» i «Lutaść», paviedamiŭ, što adna z prychilnic zhvałciła jaho padčas art-pierformansu ŭ Łos-Andželesie.
Niezvyčajnaja art-instalacyja pad nazvaj #IAMSORRY («Prabačcie mnie») prachodziła ŭ lutym 2014 hoda. Sutnaść prajekta zaklučałasia ŭ tym, što Šaja Łabaf piać dzion znachodziŭsia ŭ pamiaškańni halerei, a luby žadajučy moh zajści da jaho i zrabić z akcioram ŭsio, što zachoča. Pry hetym, pavodle idei art-pierformansu, Łabaf nie pavinien byŭ supraciŭlacca i razmaŭlać. Jon byŭ apranuty ŭ smokinh, a na hałavie ŭ jaho byŭ papiarovy pakiet.
Jak pryznaŭsia akcior u intervju Dazed Digital, adna z prychilnic raździeła jaho i zhvałciła.
«Jana pryjšła z bojfrendam, jaki stajaŭ za dźviaryma, — raspavioŭ Šaja Łabaf. — Tam u čarzie stajali sotni ludziej, kali jana vyjšła rastrapanaja i sa zmazanaj pamadaj. Mnie było nie pa kajfu, dy i jaje chłopcu, napeŭna, taksama».
Siarod sotni śviedak sceny apynułasia i dziaŭčyna halivudskaha akciora Mija Hot. «U čarzie taksama stajała maja dziaŭčyna, heta ž byŭ Dzień śviatoha Valancina, a ja na praciahu piaci dzion žyŭ u halerei, tamu my nie bačylisia i nie mieli znosin. Joj taksama było baluča, pakolki, ja dumaju, hetaja navina abmiarkoŭvałasia ludźmi ŭ čarzie. Kali jana ŭvajšła, to zapatrabavała tłumačeńni, a ja nie moh havaryć, i my abodva siadzieli moŭčki», — razhavaryŭsia Šaja.
Inšyja naviedniki šturchali jaho, adbirali sumku, rabili sełfi, a taksama cisnuli jamu ruku, płakali razam ź im, pramaŭlali słovy padtrymki.
Padobny pierformans ŭpieršyniu praviała mastačka Maryna Abramovič u 1974 hodzie. Na stale pierad saboj jana rasstaviła 72 pradmiety, jakimi možna było b łaskava abo žorstka ŭździejničać na mastačku. Da kanca šaścihadzinnaha šou hledačy stanavilisia ŭsio ahresiŭniej, vykarystoŭvali nož, plotku, adzin z naviedvalnikaŭ halerei chacieŭ strelić u Abramovič. Kali ŭdzielnica art-prajekta ŭstała i pajšła da hledačoŭ, jany, spałochanyja, raźbiehlisia.
Šaja Łabaf adkryŭ u sabie talent da pravakacyj paśla taho, jak źniaŭsia ŭ skandalna viadomaha režysiora Łarsa fon Tryjera ŭ karcinie «Nimfamanka». Naprykład, na premjery filma «Nimfamanka» ŭ Bierlinie akcior źjaviŭsia z papiarovym pakietam na hałavie i nadpisam «Ja bolš nie znakamitaść».
