Režysior Svabodnaha teatra Uładzimir Ščerbań vykłaŭ videa, na jakim artystyčna začytvaje vierš Karatkieviča. «Naša Niva» pahutaryła ź im pra historyju videa i tvorčyja płany.
«Prykładna paŭhoda tamu moj znajemy Dzianis Burko, kiraŭnik prajektu «Litara A», prapanavaŭ mnie ŭziać udzieł u fłešmobie, sutnaść jakoha — zapisać videavierš i kinuć vyklik kamuści», — raspaviadaje Uładzimir Ščerbań. «Siońnia šmat roznych fłešmobaŭ u siecivie, ale hety mnie sapraŭdy spadabaŭsia — ščyra dumaju, što paezija maje šaniec abjadnać nas».
Na jaho dumku, Uładzimir Karatkievič bolš viadomy jak prazaik, a jahonaja paezija niedaacenienaja. «Zajac varyć piva» — lubimy vierš Ščerbania, u jakim, na dumku režysiora, skancatravanaja sutnaść paezii Karatkieviča — ščyraść, harkavataja ironija, lohkaść i aktualnaść.
«Ja vielmi chacieŭ zapisać hety vierš u sapraŭdnym tumanie. I voś tut zdaryłasia paŭmistyčnaja historyja. 26 listapada u Łondanie byŭ doŭhačakany mocny tuman, akurat jaki mnie byŭ patrebny. Tak ja i zapisau hetaje videa na iPhone», — pryhadvaje jon.
«A praź niekalki dzion, kali ja užo mantavaŭ videa, daviedaŭsia, što 26-ha byŭ dzień narodzinaŭ Karatkieviča. Prosta supadzieńnie?»
Uładzimir Ščerbań nie kidaje nikomu vyklik — jon kaža, što čytaje dla svajho zadavalnieńnia. «Nu a jak jašče možna čytać paeziju?» — śmiajecca jon. Ale dadaje, što budzie vielmi rady, kali chtości adkaža svaim lubimym vieršam.
Videazapisam na Facebook padzialiŭsia mastacki kiraŭnik Svabodnaha teatra Mikałaj Chalezin. «Zaŭždy chacieŭ zrabić na Vałodziu monaśpiektakl. U jaho dar vyrazna asensoŭvać pradmiet, ab jakim jon havoryć. Mo jašče i atrymajecca kali-niebudź», — prypisaŭ jon da videa.
«Tak, čas ad času ŭ nas uźnikaje razmova pra śpiektakl, u jakim ja byŭ by ŭ jakaści aktora, ale na sioniašni dzień ja addaju paravahu režyssury», — raspavioŭ NN Uładzimir Ščerbań. «Ale, chto viedaje, usie moža zdarycca».
Svabodny teatr abiacaje paradvać u hetym miesiacy biełaruskich hledačoŭ tryma premjerami.
Adna ź ich — dakumientalny śpiektakl ab žonkach palitviaźniaŭ i žančynach-palitviaźniach «Čas žančynaŭ» u pastanoŭcy Mikałaja Chalezina. «Taksama našyja studenty pakažuš svoj pieršy ŭ žyćci śpiektakl, jaki ź imi robić naš były student Kirył Mašeka», — dadaje Ščerbań. Sam jon zaraz repietuje tekst «Łondan» maładoha biełaruskaha dramaturha Maksima Daśko, jaki sioleta atrymaŭ Hran-pry mižnarodnaha konkursa sučasnaj dramaturhii «Cvabodny teatr».
Akramia taho režysior abiacaje zładzić vydeapremjeru śpiektakla «Košt hrošaj» (prymjera jakoha adbyłasia ŭ vieraśni ŭ Łondanie) i ŭ chutkim časie pačać repietycyi pavodle «Spoviedzi» Łarysy Hienijuš.
Biełaruskich hledačoŭ jon vinšuje ź pieršym dniom zimy, žadaje radaści i «kab chałodnaja zima była nie vielmi chałodnaj».
