Repartaž Jeŭraradyjo z hramadskich słuchańniaŭ u Maładziečnie 1 śniežnia, dzie ludzi musili pahadzicca z budaŭnictvam śvinakompleksaŭ, ale nie pahadzilisia.
«Ja chacieŭ by, kab hetaja narada prajšła dypłamatyčna. Karotkija pytańni. Kab nie było niejkich debataŭ i ź miesca vykazvańniaŭ. Ja paprasiŭ by pradstavicca, kali ŭ niekaha jość pytańni. I tady jon atrymaje dakładny i zrazumieły adkaz», — namieśnik kiraŭnika Maładziečanskaha rajvykankama pa pytańniach ekanomiki Hienadź Aktanarovič krychu źbiantežana ahladaje zapoŭnienuju amal całkam vialikuju zału pasiedžańniaŭ.
Viečaram 1 śniežnia siudy nabiłasia kala 70 čałaviek. Nie ličačy dziasiatka žurnalistaŭ i dvuch dziasiatkaŭ raznastajnych pradstaŭnikoŭ ułady. Pobač zAktanarovičam siadzić pieršy namieśnik kiraŭnika rajvykankama Hienadź Bažko, staršynia miascovaha savieta deputataŭ Viktar Nieviarovič, dyrektar zakazčyka budaŭnictva śvinakompleksaŭ kampanii «Viales-Mit» Juryj Ivanoŭ. Krychu dalej kiraŭnictva milicyi, vodakanała, pradstaŭnik kampanii-prajekciroŭščyka, ekołah ź Minska. I jašče dziasiatak maładych i nie vielmi ludziej u akuratnaj vopratcy. «Ty hladzi, usie razam pasieli ŭ prezidyumie, i načalstva, i biźniesmieny. Užo ab usim damovilisia, jasna», — pajšła pahałoska ŭ zale.
Aktanarovič pačynaje pramaŭlać pieršym. Raskazvaje pra śvietłuju budučyniu maładziečanskaj śvinahadoŭli i cełyja dźvie sotni novych i takich nieabchodnych stotysiačnamu horadu pracoŭnych miescaŭ. Inviestycyj — 70 miljonaŭ jeŭra.
Za Aktanarovičam da mikrafona padychodzić pradstaŭnik prajekciroŭščyka, nazyvajecca Arkadziem i pačynaje pryhoža raskazvać pra supiersučasnaść budučaha kompleksa na 100 tysiač śviniej u hod. Navat słajdy pakazvaje. Vystupaje Arkadź niadoŭha — ludzi pierabivajuć jaho pytańniami. Asnoŭnaje — navošta budavać hihancki śvinakompleks za 3 kiłamietry ad horada.
«My razam z zakazčykam Maładziečanski rajon abjechali, napeŭna, nie adzin raz. I voś nabrałasia dva ŭčastki. My ŭ pieršuju čarhu brali tyja, jakija znachodziacca na adlehłaści nie bolš za kiłamietr ad žylla», — apraŭdvajecca Arkadź.
U zale rohat. I prapanovy «pašukać placoŭku ŭ Drazdach». Bolš kanstruktyŭnyja hramadzianie prapanujuć pieranieści budaŭnictva ŭ Homielskuju ci Mahiloŭskuju vobłaść. Dla žycharoŭ Maładziečna nie sakret, što novy maładziečanski miasakambinat i śvinafiermy, jakija źbirajucca dla jaho budavać, svaju pradukcyju budzie pastaŭlać u Rasiju.
Z pačatkam druhoj hadziny hramadskija słuchańni kančatkova pieratvarajucca ŭ pikiroŭku ź dziadźkami ŭ kaściumach, jakija zaniali prezidyum. Hienadź Aktanarovičsprabuje ŭtajmavać ludziej, u adkaz čuje pra 380 užo sabranych suprać budaŭnictva podpisaŭ. «Možna sabrać podpisy i za budaŭnictva!» — apraŭdvajecca čynoŭnik. U adkaz iznoŭ rohat i prapanova pasprabavać.
Adčajaŭšysia, Aktanarovič daje hołas halorcy: «Voś vy, mužčyna ŭ čyrvonym švedry, skažycie vy».
Mužčynam u čyrvonym švedry akazvajecca ilhotnikam, jaki šmat hadoŭ stajaŭ u čarzie pa ŭčastak i dva hady tamu narešcie jaho atrymaŭ… akurat pobač ź miescam budučaha śvinakompleksa.
«Jość ža prajekty raźvićcia horada. I kali ja svoj učastak atrymlivaŭ u 2012 hodzie, mianie z płanami budaŭnictva śvinakompleksa nie paznajomili. Ja b nie braŭ tam učastak, razumiejecie? Ja jaho zaraz nikomu ŭžo nie pradam», — havoryć jon.
Aktanarovič u adkaz prapanoŭvaje zapisacca na pryjom u rajvykankam. A žančynie, zaniepakojenaj tym, što viecier u bok horada dźmie akurat z boku budučaha śvinakompleksa, nie adharodžanaha navat lesapałasoj, čynoŭnik raić u vypadku čaho «zvanić u sanstancyju». U zale iznoŭ rohat, ale prezidyumu ŭžo nie da śmiechu.
Vystupaje ekołah ź Minska. Jon pierakanany, što prajekt budučych śvinakompleksaŭ Maładziečanskaha rajona adpaviadaje ŭsim normam. Ale naryvajecca na dziaŭčynu, jakaja pryniesła padpisanuju im ža ekśpiertyzu pa inšym śvinakompleksie, užo pabudavanym.
«Tam parušanyja ŭsie normy, ludzi skardziacca, što śmiardzić, na brudnuju vadu, a vy i pra toje budaŭnictva taksama pryhoža havaryli», — paviedamlaje jana zale. U adkaz — «Padvoch! Ekołaha pad sud!»
Za niebaraku, jakoha ludzi hatovyja prosta ciapier brać pad ručki i nieści ŭ pastarunak, narešcie sprabuje zastupicca dyrektar «Viales-Mita» Ivanoŭ.
«Ja ni ŭ jakim razie nie dazvolu budaŭnikam nie vykanać patrabavańni da budaŭnictva śvinakompleksa. Heta ž vielmi surjozna. A nakont lesapałasy — heta ŭsio budzie budavacca», — pierakonvaje jon.
I navat raskryvaje sakret — na sistemu ačystki adchodaŭ śvinakompleksa płanujecca vydatkavać ažno 2 miljony jeŭra. Ivanoŭ taksama abiacaje ŭličyć usie zaŭvahi i danieści svajmu kiraŭnictvu, abmierkavać usio z uładami. «My tut nie prosta tak sabralisia», — pierakonvaje biźniesmien. Ale paśla paradaŭ zvanić u sanstancyju ludzi nie vielmi pierakonvajucca. Jany sprabujuć daviedacca ŭ čynoŭnikaŭ, što možna zrabić, kab śvinakompleksy nie budavali. Adkazu na hetaje pytańnie, paŭtoranaje razoŭ piać roznymi ludźmi, čynoŭniki tak i nie dajuć.
Ahulny sens «słuchańniaŭ» z boku haradžan ahučvaje maładziečanski inžynier. Spačatku jon raskazvaje, što ačyščalnyja sistemy dla 100-tysiačnaha kompleksa ja kaštavać kala 7-8 miljonaŭ jeŭra, a zusim nie 2. I dadaje, što kančatkova ačyścić adkidy ŭvohule niemahčyma — vadkaść usio adno vyljuć na najbližejšyja pali, adkul jana trapić u hruntovyja vody. A miesca na ŭskrajku horada vybranaje, na dumku inžyniera, praz banalnuju zručnaść dla budaŭnictva i minimalnyja łahistyčnyja zatraty:
«Ja razumieju, što vy hety ŭčastak vybrali, bo pobač jość haz, elektryčnaść, daroha. I mnie padajecca, što heta vielmi drenna. Bo ja tam žyvu. Znajdzicie inšaje miesca. Chaj hety śvinakompleks pracuje. Ale znajdzicie inšaje miesca. Hetyja 50 tysiač śviniej tut niepatrebnyja. Heta vielmi šmat. Nam nie treba tut stolki haŭna».
«Słuchańni», jakija miescami nahadvajuć narodny bunt, u vialikaj zale maładziečanskaha rajvykankama ciahnucca amal try hadziny. Zaviaršajucca pytańniem u łob namieśniku kiraŭnika rajvykankama Aktanaroviču: «A vy jak haradžanin chočacie, kab tut budavali hety śvinakompleks?» — «Ja pakinu svajo mierkavańnie pry sabie», — kidaje čynoŭnik ludziam i sychodzić.
Nahoda hramadskich słuchańniaŭ: na pačatak 2015 hoda ŭ Maładziečanskim rajonie zapłanavanaje budaŭnictva dvuch śvinakompleksaŭ «mahutnaściu» 100 tysiač śviniej u hod. Adnačasova na kožnym z kompleksaŭ płanujecca trymać kala 57 tysiač śviniej. Zakazčykam budaŭnictva vystupaje biełaruska-rasijskaja kampanija «Viales-Mit» (da červienia 2014 hoda — «Trajpł-Viales»). Adzin z kompleksaŭ zapłanavany na adlehłaści 3 kiłamietraŭ ad Maładziečna. Jašče adzin — na miažy Maładziečanskaha i Vałožynskaha rajonaŭ. Žychary horada i viosak, jakija znachodziacca pobač ź miescam budučaha budaŭnictva, sabrali ŭžo kala 900 podpisaŭ suprać. Jany pierakananyja, što prajekt składzieny z parušeńniami biełaruskaha zakanadaŭstva i naniasie niepapraŭnuju škodu ekałohii rehijona.
Kančatkovaje rašeńnie ab pačatku budaŭnictva miascovyja ŭłady pavinnyja pryniać u najbližejšy miesiac.
