Alaksandr Łukašenka ličyć, što Rasii nie varta sprabavać siłami Biełarusi zabaranić tranzit sankcyjnych tavaraŭ. Pra heta jon zajaviŭ siońnia na naradzie ab pryniatych mierach pa źniaćci zabaronaŭ na ŭvoz biełaruskaj pradukcyi ŭ Rasijskuju Fiederacyju i tranzit tavaraŭ sankcyjnych śpisu, pieradaje karespandent BIEŁTA.
«Kali Rasija nie choča, kab niejkija tavary išli praź jaje tranzitam u Kazachstan, Uźbiekistan, Kitaj, Manholiju, Turcyju i inšyja krainy — chaj jana zajmajecca zabaronaj hetaha tranzitu. Ale nie my!» — padkreśliŭ Łukašenka.
«My tranzitnaja respublika, my ad hetaha atrymlivajem choć i nievialikija, ale niejkija hrošy. My nie možam zabaranić praz našu terytoryju tranzit tavaraŭ u inšyja krainy. Heta parušeńnie ŭsich normaŭ mižnarodnaha prava», — skazaŭ jon.
«I my razumiejem, što Rasija nas takim čynam šturchaje napieradzie siabie, kab my zabaranili, my nie puskali. A ŭ toj ža čas cieraz prybałtyjskija miažu i inšyja pamiežnyja punkty jany pavialičvajuć hety tranzit», — adznačyŭ Łukašenka.
«Uźnikaje pytańnie: jany što, chočuć začynić Biełaruś jak tranzitnuju dziaržavu? Heta ž naš resurs! My hetaha dapuścić nie možam!» — padkreśliŭ Łukašenka. «My pieradajom Rasii, nu a jany tam niachaj zabaraniajuć, kali chočuć nie dapuścić tranzitu. Ale heta, jašče raz padkreślivaju, parušeńnie ŭsich normaŭ mižnarodnaha prava i nam nie varta ŭ hety ŭciahvacca», — ličyć Łukašenka.
«My damovilisia z rasijskimi partniorami, što nie budziem pakutavać ad uviedzienych u adkaz ekanamičnych sankcyj u dačynieńni da Amieryki i Jeŭropy. Nam daj boh b vyleźci z tych sankcyj, jakija ŭžytyja suprać nas. My ž nie možam dałučacca da sankcyj i paharšać svajo stanovišča, i tak u nas chapaje prablem «, — dadaŭ jon.