Supracoŭniki KDB pravodziać pieratrus u ofisnym budynku pa vulicy Fabrycyusa, 9/A ŭ Minsku. Prykładna ŭ 11 hadzinie ranicy ŭ budynak pryjšli niekalki dziasiatkaŭ čałaviek u formie i pačali pieratrus u ofisnych pamiaškańniach. Čytačy zaŭvažyli na vopratcy haściej našyŭki z nadpisam «KDB».
Što mienavita zacikaviła supracoŭnikaŭ kamiteta, pakul niezrazumieła. U budynku znachodzicca mnostva ofisaŭ roznych kampanij — ad STA i veb-studyi da škoły zamiežnych moŭ, ahienctva pierakładaŭ, salaryja, majsterni pa pašyvie adzieńnia i inšyja.
Paviedamlajecca, što ŭsich rabotnikaŭ pa pavierchach paprasili pakinuć kožnaje pamiaškańnie i pastroicca ŭzdoŭž ścien kalidoraŭ. Paśla čaho ŭ pakoi zaprašali paniatych i pravodzili ahlad za začynienymi dźviaryma.
Usiaho ŭ budynku čatyry pavierchi, na kožnym ź ich pracavała kala dziasiatka čałaviek.
Pa niekatorych dadzienych, supracoŭniki KDB da hetaha času znachodziacca ŭ budynku, rabotnikam pakul zabaranili vychodzić z budynka, niekalki mikraaŭtobusaŭ raźmiaščajucca na vulicy.
Supracoŭniki Tut.by pasprabavali vyśvietlić padrabiaznaści ŭ inšych rabotnikaŭ centra z roznych ofisaŭ. U niekatorych supracoŭniki adkazvajuć na zvanki, adnak na pytańnie pra pieratrus abo admaŭlajucca kazać, abo ŭdakładniajuć, što «pra heta kazać nie mohuć».
Načalnik pres-słužby KDB Artur Strech paviedamiŭ, što pakul nie moža dać jakuju-niebudź infarmacyju pa hetaj nahody, paabiacaŭšy ŭdakładnić hetaje pytańnie ŭ bližejšy čas.
