U hetyja dni my ŭsie (čarhovy raz) stanovimsia śviedkami histaryčnych pracesaŭ. Zdajecca, nichto pakul nie źviarnuŭ uvahu na ŭnikalnuju situacyju, kali
ŭpieršyniu za apošnija dvaccać hadoŭ biełaruskija zarobki i piensii mohuć pieravysić rasiejskija.
Pavodle dadzienych na vierasień hetaha hodu, siaredniaja pensija ŭ Rasii składaje kala 10900 rasiejskich rubloŭ. Kali raniej, pry stabilnym kursie ŭ rajonie 36 rubloŭ za dalar — heta było kala 300 dalaraŭ, to ciapier, pa kursie 54 rubli, heta 200 dalaraŭ! Tym časam u Biełarusi siaredniaja pensija ŭ listapadzie skłała 2 miljony 643 tysiačy, to bok kala 250 dalaraŭ.
Siaredni zarobak u Rasii — kala 33 tysiač rubloŭ (pry hetym treba razumieć, što bolš za pałovu nasielnictva atrymlivaje da 20 tysiač, a vysokaja siaredniaja ličba ŭtvarajecca ŭ tym liku dziakujučy niekalkim pracentam ludziej ź vielmi vialikimi dachodami). I kali da padzieńnia rubla hetaja ličba vyhladała dla biełarusaŭ niejak zavobłačna, to ciapier heta prazaičnyja 610 dalaraŭ. U Biełarusi siaredni zarobak u kastryčniku — 6 miljonaŭ 377 tysiač, to bok 590 dalaraŭ. Jašče paru punktaŭ padzieńnia rasijskaha rubla, i zarobki biełarusaŭ aŭtamatyčna abhoniać rasijskija.
Ciapier u Rasii pieramohaŭ užo niama, Rasieja pačynaje biadnieć, a rubiel valicca — za što lubić takuju krainu praktyčnamu i cyničnamu biełarusu?
Niama nijakich padstavaŭ ličyć, što bližejšym časam ekanamičnyja spravy Rasii palepšacca, navat prahnozy aficyjnych rasijskich viedamstvaŭ praduhledžvajuć padzieńnie vytvorčaści ŭ nastupnym hodzie. Kurs 60 rubloŭ za dalar na kaniec hodu mnohija ekśpierty nazyvajuć vielmi aptymistyčnym scenaram. Pavodle rasiejskich analitykaŭ, ekanamičny kryzis, recesija byli niepaźbiežnym vynikam pracesaŭ apošnich hadoŭ, a padzieńnie koštaŭ na naftu i zachodnija sankcyi suprać Rasii hety praces tolki paskoryli i ŭzmacnili.
Kali biełarusy — dziakujučy ŚMI i asabistym kantaktam — uśviadomiać novuju situacyju, to ichniaje staŭleńnie da Rasii niepaźbiežna pačnie mianiacca.
Pasprabuju adznačyć niekatoryja najbolš vidavočnyja nastupstvy hetaha pracesu. Pierš za ŭsio, jak ja pierakanany, pryvabnaść Rasii ŭ vačach šarahovaha biełarusa praciahnie padać. Pavodle sacyjołahaŭ, pik lubovi da Rasii, jaki nastupiŭ u momant anieksii Krymu, užo projdzieny. Rasieja pieramahała, i biełarusy, jakija lubiać pieramožcaŭ (urešcie, heta ŭłaściva mnohim narodam, ale, mahčyma, biełarusam u bolšaj stupieni), Rasiju horača palubili.
Ciapier u Rasii pieramohaŭ užo niama, Rasija pačynaje biadnieć, a rubiel valicca — za što lubić takuju krainu praktyčnamu i cyničnamu biełarusu?
Padzieńnie rasijskaha rubla stvaraje kardynalna novaje ŭjaŭleńnie pra rasiejcaŭ u biełaruskaj masavaj śviadomaści. Faktyčna ŭsie apošnija 20 hadoŭ rasiejcy abhruntavana ŭsprymalisia jak bolš zamožnyja, u masavym staŭleńni da ich panavała pryblizna takaja farmuloŭka:«zarobki ŭ ich, kaniešnie, bolšyja, zatoje ŭ nas darohi lepšyja, paradku bolš i aliharchaŭ niama». Ciapier u hetaj formule siarmiažnaj mudraści źnikaje toje amal adzinaje, što padabałasia ŭ Rasii masavamu biełarusu.
Dalej.
Padzieńnie zarobkaŭ u Rasii ŭ dołaravym vyličeńni pryviadzie da rezkaha pamianšeńnia biełaruskich hastarbajteraŭ.
Navošta ryzykavać, jechać u čužuju krainu za sotni kiłamietraŭ ad domu, žyć i pracavać časta ŭ nievynosnych umovach — kab atrymać u vyniku nie našmat bolej, jak na radzimie. Dziesiatki, a to i sotni tysiač biełarusaŭ, pieravažna pracoŭnaha, aktyŭnaha ŭzrostu viernucca z Rasii ŭ svaju krainu. Jaki ŭpłyŭ heta zrobić na rynak pracy, na sacyjalnuju stabilnaść? — Pakul ciažka skazać. Ale fakt, što heta dadatkovy vyklik i prablema dla biełaruskaj ułady, bo hadami prablemy biespracoŭja i sacyjalnaj napružanaści aŭtamatyčna vyrašalisia pracoŭnaj mihracyjaj samych aktyŭnych hramadzianaŭ.
Nastupny aśpiekt — na fonie prablem ź biudžetam vidavočna budzie pavialičvacca ekanamičny ehaizm rasijskich uładaŭ.
Ciapierašni kanflikt ź biełaruskimi praduktami — heta tolki pieršyja łastaŭki. Na fonie źnižeńnia dachodaŭ ułasnaha nasielnictva lubyja zachady suprać Biełarusi buduć usprymacca bolš pazityŭna i biźniesam, i rasiejskim nasielnictvam — maŭlaŭ, «samim nie chapaje». Urešcie, roli buduć mianiacca, bo z-za padzieńnia rubla ciapier užo Biełaruś budzie vymušanaja adbivacca ad nielehalnaha impartu praz Rasiju tannych zachodnich i ŭschodnich tavaraŭ.
Vyhladaje, što paśla niekalkich hadoŭ adnosnaha zacišša my ŭstupajem u epochu novych handlovych vojnaŭ z Rasijaj.
Padzieńnie rasijskaj valuty ŭžo ciapier uskładniła žyćcio biełaruskich eksparcioraŭ. Źnikaje hałoŭnaja pieravaha biełaruskaha ekspartu ŭ Rasii — tanny košt.
Užo ŭ kastryčniku biełarusy pradali ŭ Rasiju bolš u tavarnym vyličeńni, ale atrymali za heta mienš hrošaj.
Namieśnik ministra sielskaj haspadarki i charčavańnia Biełarusi jašče 11 listapada zajaŭlaŭ, što Biełaruś nie vyjhraé, a navat stračvaje ad ekspartu ŭ Rasiju z-za devalvacyi rasijskaha rubla (jaki byŭ tady 45). Dachody biudžetu ad ekspartu ŭ Rasiju vidavočna źniziacca, a situacyja na pradpryjemstvach, zaviazanych vyklučna na Rasiju, kardynalna pahoršycca, što adpaviednym čynam budzie ŭpłyvać na nastroi ichnich supracoŭnikaŭ.
…Ahulnym miescam stała kazać, što prezidenckaja kampanija 2015 hoda nie moža mieć nijakich siurpryzaŭ, što jaje chada i vynik zahadzia pradvyznačanyja. Adnak padzieńnie rubla i tyja čyńniki, jakija ŭspłyvajuć u hetaj suviazi, stvarajuć u peŭnym sensie novuju sacyjalna-ekanamičnuju situacyju ŭ Biełarusi.
Padajecca dastatkova imaviernym, što kampanija projdzie na fonie antyrasijskaj rytoryki z boku aficyjnaha Minsku,
na fonie handlovych vojnaŭ, paharšeńnia ekanamičnaj situacyi, rostu sacyjalnaj napružanaści i źmieny ŭspryniaćcia Rasii z boku bolšaści nasielnictva. Tamu — nie tak usio i adnaznačna, jak zdavałasia jašče niekalki miesiacaŭ tamu.