U Vialikim teatry ŭ Maskvie ŭ niadzielu, 7 śniežnia, adbyvajecca dabračynny hała-kancert u padtrymku Kijeŭskaha chareahrafičnaha vučylišča.
Na afišy kancertu namalavanyja balaryny ŭ žoŭtych i sinich kolerach — kolerach ŭkrainskaha ściaha.
U kancercie biaruć udzieł zorki suśvietnaha baleta, jakija ŭ svoj čas vučylisia ŭ Kijeŭskim chareahrafičnym vučyliščy, a taksama ich zornyja partniory. Vystupiać taksama budučyja zorki — samyja adoranyja navučency Kijeŭskaha chareahrafičnaha vučylišča.
U prahramie — uryŭki z baletaŭ, jakija stali «vizitnymi kartkami» teatraŭ, na scenach jakich vystupajuć ŭdzielniki kancertu: «Karmen-siuita» Bize — Ščadryna, sceny z baletaŭ «Ramea i Džuljeta» Prakofjeva, «Lebiadzinaje voziera» Čajkoŭskaha, «Ličbavaje kachańnie»/Digital Love Hiendela — K.P.Kintana.
Ź inicyjatyvaj dabračynnaha viečara «Balet bieź miežaŭ» vystupiła zorka Vialikaha teatra Śviatłana Zacharava.
Zacharava i pradziusar hała-kancerta Juryj Baranaŭ abodva pačali svaju vučobu i karjeru ŭ Kijevie. Jany kažuć, što prybytki ad «Baleta bieź miežaŭ» dapamohuć ich alma-matar. «Ja nie mahła zastacca ŭ baku, i tamu vystupiła ź inicyjatyvaj pravieści ŭ Vialikim teatry dabračynny kancert, na atrymanyja srodki ad jakoha ŭ vučyliščy budzie zrobleny ramont», — raspaviała Zacharava.
Usie kvitki na kancert pradadzienyja, u tym liku i VIP-pakiety koštam ad 3,5 to 11 tysiač dalaraŭ.
Arhanizatary spadziavalisia pieradać u Kijeŭ da 300 tysiač dołaraŭ, ale z-za padzieńnia kursu rasijskaha rubla hetaja ličba moža skaracicca ŭdvaja, pieradaje Bi-Bi-Si.
