Kali chobit Bilba najmaŭsia pamahatym u atrad z trynaccaci hnomaŭ, jon ličyŭ, što pryhoda skončycca, jak tolki jon znojdzie peŭny skarb. Jon i ŭjavić nie moh, što jamu daviadziecca ŭciakać ad drakona i stać śviedkam cudaŭ i hrandyjoznaj bitvy z orkami. Taksama jak nie moh ujavić, što jaho kazku raściahnuć na try filmy i šeść z pałovaj hadzin.

Recept błokbastaraŭ Pitara Džeksana ŭ suśviecie Tołkina nie mianiajecca: malaŭničyja prastory Mižziemja (zdymali film u Novaj Ziełandyi), maštabnyja bitvy (kampjutarnaja hrafika), bajavoje tavarystva i ramantyka vandroŭki.

Jak i «Uładar piarścionkaŭ», «Chobit» mieŭ kamiercyjny pośpiech. Pieršyja dva filmy tryłohii sabrali dva miljardy dalaraŭ. Ci mohuć paśla takoha być pytańni ab metazhodnaści raściahvańnia kazki na try stužki?

Premjera treciaha «Chobita» prajšła 1 śniežnia ŭ Vialikabrytanii. 80% krytykaŭ stanoŭča acanili stužku, daŭšy joj 6,9 bała z 10 mahčymych. Heta trochi vyšej za toje, što mieli papiarednija sieryi «Chobita», ale na paŭtara bała nižej za kožnaha «Uładara piarścionkaŭ».

«Film praktyčna całkam składajecca z batalnych scen i moh by stać vielmi nudnym. Ale Džeksan zaŭsiody zdolny pakazać intymnaść u najvialikšych i samych šumnych scenach», — piša hazieta The Independent.

«Bolš bitvaŭ, bolš pačvar, bolš nie zusim kamičnych adstupleńniaŭ, bolš suvoraha aratarstva, bolš ašałamlalnaha, daskanała zroblenaha ekšanu», — biez asablivaha zachapleńnia piša «Time Out».

«Sto sorak čatyry chviliny stužki pakazvajuć najhoršyja schilnaści Džeksana: doŭhija batalnyja sceny, što zdajucca viečnymi, sientymientalnyja i abryvistyja prakłamacyi, napyšlivyja ramansy, kamizm nie ŭ temu i ŭpieršyniu pravierka ciarpieńnia fanataŭ», — rezka vykazvajecca «The Wrap».

Što b ni kazali krytyki, hledačy zadavolenyja stužkaj. Siaredniaja adznaka hledačoŭ novamu «Chobitu» skłała 9,4 bała z 10. Treba adznačyć, što film jašče nie pakazvaŭsia ŭ ZŠA, a ŭ amierykanskaha hledača svaja sistema kaštoŭnaściaŭ.

Hałoŭnaje, što ŭvieś śviet nie chutka zabudzie pryhody chobita. Nie zabuduć ich i akciory: vykanaŭca roli chobita Bilba Marcin Fryman zabraŭ sa zdymak na pamiać mieč i «pratezy» vušej, a Ijen Makkielen (Hiendalf ) — słavuty vostrakaniečny kapialuš čaraŭnika.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?