Užyvańnie spajsaŭ padobna na hulniu ŭ ruletku, zychod jakoj nie pradkazać. Takoje mierkavańnie siońnia vykazaŭ namieśnik premjer-ministra Anatol Tozik na sustrečy z navučencami Barysaŭskaha dziaržaŭnaha kaledža.
«Štodnia źjaŭlajucca novyja raznavidnaści spajsaŭ.
I nieviadoma, čym skončycca ich ŭžyvańnie — moža, prosta paskačaš abo patancuješ, a moža, usio skončycca śmiarotna i heta budzie pieršy i apošni raz, kali pasprabavaŭ narkotyk», — skazaŭ Anatol Tozik.
Namieśnik premjer-ministra adznačyŭ, što na padychodzie jašče adna biada — tak zvanyja enierhietyčnyja napoi.
«Ja miarkuju, što my va ŭradzie inicyjujem normu ab zabaronie enierhietyčnych napojaŭ. Mnohija jeŭrapiejskija krainy ŭžo ŭbačyli niebiaśpieku hetaj źjavy. Toje, što ŭ nas pradajecca, raskładaje straŭnik i inšyja orhany. I nichto nie viedaje nastupstvaŭ», — adznačyŭ Anatol Tozik.
Zaraz zakanadaŭstvam Biełarusi ŭstanoŭleny niekatoryja patrabavańni pa prodažy enierhietyčnych napojaŭ.
Tak, vyznačana, što pry realizacyi biezałkaholnych enierhietyčnych napojaŭ na kožnaj adzincy ŭpakoŭki pakazvajucca źviestki ab pakazańniach da jaho prymianieńnia asobnymi ŭzrostavymi hrupami nasielnictva, uzhodnienyja ź Ministerstvam achovy zdaroŭja. Razam z tym prodaž enierhietykaŭ niepaŭnaletnim nie zabaronienaja.
Zaraz enierhietyki całkam zabaronienyja ŭ Danii, Turcyi, Narviehii, Uruhvai i Isłandyi, a taksama ŭ niekatorych štatach ZŠA (Vašynhton, Juta, Akłachoma i Mičyhan)
