Paśla doŭhich hadoŭ zabyćcia na zachadzie Francyi była znojdzienaja lehiendarnaja kalekcyja aŭtamabilaŭ 50-60 hadoŭ.
50 transpartnych srodkaŭ kalekcyi pakrytyja pyłam, ale davoli dobra zachavalisia: Bugatti, Hispano-Suiza, Talbot-Lago, Panhard-Levassor, Maserati, Ferrari, Delahaye, Delage i Hispano mirna spali pad toŭstym płastom pyłu.
Znojdzienaja kalekcyja pieršapačatkova źbirałasia ŭ pieryjad z 1950-ch pa 1970-ja pradprymalnikam Raže Bajonam, jaki płanavaŭ zrabić muziej aŭtamabilaŭ. Na žal, hetaj mary nie było nakanavana ažyćciavicca: z-za bankructva svajho biznesu Bajonu pryjšłosia pradać kala 50 aŭtamabilaŭ. Ale siarod starych aŭtaamataraŭ zaŭsiody chadzili čutki, što Raže Bajon zdoleŭ zachavać samyja kaštoŭnyja rečy svajoj kalekcyi. Spadar Bajon pamior kala 10 hadoŭ tamu, a jahony syn pamior letaś. Unuk Raže Bajona, jaki atrymaŭ u spadčynu majontak, nikoli nie dumaŭ, što ŭ zakinutych haspadarčych pabudovach źmiaščajucca sapraŭdny skarb.
U kalekcyi, jakuju ličyli stračanaj, majucca sapraŭdnyja cudy – naprykład, Maserati A6G 200 Berlinetta Grand Sport 1956 hoda, sprajektavanaja Pjetra Frua; takich mašyn było vypuščana ŭsiaho try.
Najvažniejšaja detal kalekcyi — Ferrari 250 GT SWB California Spider, sapraŭdnaja lehienda, jakaja naležała akcioram Žeraru Blenu i Alenu Dełonu. Hetuju mašynu amatary kino mahli bačyć u filmie «Drapiežnicy»: u joj siadziać Džejn Fonda i Ałen Dełon. Košt rarytetnaha aŭtamabila aceńvajecca ŭ 14,8 młn dołaraŭ. Ferrari hetaj madeli było vypuščana ŭsiaho 36 štuk.
Taksama ŭ kalekcyi znachodzicca mašyna Talbot-Lago T26 Grand Sport, jakaja naležała jehipieckamu karalu Faruku.
Niekatoryja z mašyn praržavieli nastolki, što ŭžo nie padlahajuć adnaŭleńniu, ale inšyja niadrenna zachavalisia i kaštujuć sotni tysiač dołaraŭ.
Kalekcyja budzie vystaŭlenaja na aŭkcyjon 6 lutaha 2015 hoda.
