Pracedura vybaraŭ prezidenta Respubliki Biełaruś moža być źmienienaja praz refierendum, ukazvajuć u pastajannaj kamisii pa dziaržaŭnym budaŭnictvie, miascovym samakiravańni i rehłamiencie Pałaty pradstaŭnikoŭ u adkaz na zvarot hrupy hramadzian.
Nahadajem, u listapadzie 104 žychary Mahilova źviarnulisia z prośbaj da deputataŭ Pałaty pradstaŭnikoŭ, kab jany z metaj ekanomii biudžetnych srodkaŭ praviali prezidenckija vybary 2015 hoda samastojna, biez utvareńnia vybarčych kamisij u rehijonach krainy. Na dumku padpisantaŭ, praviadzieńnie vybraŭ takim čynam dazvolić zachavać 100 młrd rubloŭ i viarnuć ich «u pieršuju čarhu ŭkładčykam stałaha vieku». Aprača taho, «madernizavanyja» vybary prezidenta dazvolać pakinuć u minułym niepryznańnie vynikaŭ biełaruskich vybaraŭ mižnarodnaj supolnaściu, sankcyi i nievyjaznych dziaržčynoŭnikaŭ, havaryłasia ŭ zvarocie mahilaŭčan.
Dla źmieny ŭstanoŭlenaha zakonami paradku praviadzieńnia vybaraŭ prezidenta Respubliki Biełaruś patrabujecca ŭniasieńnie adpaviednych źmienaŭ u Kanstytucyju i Vybarčy kodeks, havorycca ŭ adkazie staršyni pastajannaj parłamienckaj kamisii pa dziaržaŭnym budaŭnictvie, miascovym samakiravańni i rehłamiencie Hienadzia Hryckieviča, jaki adpraŭleny ŭ adras inicyjatara zvarotu hramadzian aktyvista Biełaruskaha prafsajuza REP Alaksieja Paŭłoŭskaha z Mahilova.
«U adpaviednaści z artykułam 140 Kanstytucyi Respubliki Biełaruś, raździeł IV Kanstytucyi, jaki rehłamientuje ŭ tym liku pytańni vybaraŭ prezidenta i paŭnamoctvy dziaržaŭnych orhanaŭ pa ich praviadzieńni, moža być źmienieny tolki šlacham refierendumu», — havorycca ŭ adkazie deputata.
«Jak vynikaje z adkazu, deputaty Pałaty pradstaŭnikoŭ nie suprać praviadzieńnia vybaraŭ prezidenta takim čynam, jaki prapanavali hramadzianie. H.zn. i naviersie, i ŭnizie ŭžo skłałasia ahulnaje razumieńnie metazhodnaści praviadzieńnia vybaraŭ tak, jak jany prachodziać u našaj krainie. Zastajecca tolki ŭtreści farmalnaści pa zakonach. Treba stvarać inicyjatyŭnuju hrupu i arhanizoŭvać refierendum», — zajaviŭ Alaksiej Paŭłoŭski.
Nahadajem, raniej staršynia Centrvybarkama Lidzija Jarmošyna śćviardžała, što na vybary 2015 hoda vydzielena kala 100 młrd rubloŭ.
