Sacyjalnaja supołka «Maja kraina Biełaruś», jakaja naličvaje bolš za 50 tysiač siabraŭ, vyłučyć svajho kandydata na prezydenta. Aktyvisty vyrašyli, što supraćstajać Łukašenku pavinien hieroj knih Tołkijena čaraŭnik Hendalf, i šukajuć asobu, jakaja b pieraŭvasobiłasia ŭ hetuju rolu.
Hałoŭnyja patrabavańni da kandydataŭ — 35 hadoŭ, biełaruskaje hramadzianstva i «dastatkovaja adekvatnaść». Stvaralniki supołki «Maja kraina Biełaruś» kažuć, što «praca nia pylnaja» i abiacajuć budučamu kandydatu dapamohu ŭ kampanii i zbory podpisaŭ.
Na vyłučeńnie Hendalfa ŭ prezydenta natchniŭ ukrainski Dart Vejder, jaki balatavaŭsia na prezydenckich vybarach, ale nia byŭ zarehistravany. Pavodle arhanizataraŭ, Hendalf — dobry čaraŭnik i siabra chobitaŭ, a chobity, jak viadoma, padobnyja da biełarusaŭ. Jak ličyć doktar Łant z Brystalskaha ŭniversytetu (Vialikabrytanija), Šyr — zielaninny kraj, dzie žyli Chobity, — nahadvaje Biełaruś.
Vyłučeńnie na prezydenckija vybary Hendalfa, pavodle arhanizataraŭ, maje vyśmiejać režym i prademanstravać, što vybaraŭ u krainie niama. Jak zajaviŭ adzin ź inicyjataraŭ, jaki nazyvaje siabie Arahornam, synam Aratorna, kampanija budzie pabudavanaja na pazytyvie i abjadnaje ŭsich biełarusaŭ, jakija chočuć lepšaha žyćcia:
«Spoklič našaj kampanii prosty i zrazumieły. Hendalf — naš lider, jaki paviadzie krainu da lepšaha žyćcia. Hendalf — naš kandydat».
Na pytańnie, što Hendalf budzie rabić, kali pieramoža, arhanizatary śćviardžajuć, što hałoŭnaje ciapier — zmahańnie suprać orkaŭ i supraćstajańnie Mordaru:
«Jak viadoma, u Maskvie chacieli ŭčora zapalić voka Saŭrana. Heta nievypadkova. Niedzie tam i znachodzicca Mordar», — kažuć aktyvisty.
Pavodle siužetaŭ Tołkijenaŭskich apaviadańniaŭ, Vialikaje Voka Saŭrana jość symbalem pryhniotu i strachu.
A pakul šukajecca adpaviedny kandydat, u sacyjalnych sietkach poŭnaj chadoj idzie farmavańnie kamandy i papiaredniaja ahitacyja. Chešteh kampanii — #HendalfNašKandydat
