Rekordnaje abiasceńvańnie rasijskaha rubla aznačaje niepaźbiežnyja straty dla biełaruskich pradpryjemstvaŭ. Asablivuju niebiaśpieku kryzis ujaŭlaje dla ekspartaaryjentavanych vytvorčaściaŭ biełaruskich rajonnych centraŭ i nievialikich haradoŭ.
U Babrujsku skłałasia nie vielmi spryjalnaja situacyja z ekspartam miascovaj vytvorčaści.
«Našy straty z-za skłaŭšajsia ekanamičnaj situacyi vielizarnyja! Za try apošnija miesiacy my stracili 250 tysiač dalaraŭ na eksparcie ŭ Rasiju z-za roźnicy kursaŭ. My pamianšajem adhruzki ŭ RF i pavialičvajem ceny. Ale jakimi mierami možna kampiensavać takija straty? Heta niemahčyma! Naša pradpryjemstva aryjentavana na rasijski rynak, bolš za dzievianosta adsotkaŭ ekspartu my viaziom mienavita tudy», — pryznajecca babrujskim žurnalistam namieśnik dyrektara ZAT «Babrujskmebla» Anatol Čvańkoŭ.
Vymyvańnie abarotnych srodkaŭ i tumannyja piersiektyvy niepakojać i babrujskaje TAA «Słavianka».
«Kala 70% našaj pradukcyi idzie na ekspart, ź ich 80% — u Rasiju. Vidavočna, što naša dziejnaść vielmi źviazanaja z rasijskim rynkam, a tamu toje, što adbyvajecca, dla nas katastrofa! My niasiom vielizarnyja finansavyja straty, i z kožnym dniom jany pavialičvajucca», — pieradaje «Kommierčieskij kuŕjer» słovy dyrekatara «Słavianki» Tejmuraza Bačarašvili.
Aryjentavanym na Rasiju pradpryjemstvam zastajecca tolki sačyć, jak dalej buduć raźvivacca padziei, bo zamiena rasijskaha rynku zbytu na inšyja ŭ chutkaj pierśpiektyvie — zadača amal nie vykanalnaja.
