Kniharnia siońnia. Fota Siarhieja Hudzilina.
Kultavy intelektualny adras biełaruskaj stalicy apynuŭsia pad pahrozaj źniknieńnia.
Pazapłanavaja padatkovaja pravierka pryjšła ŭ kniharniu «łohvinaŬ» u pačatku śniežnia. Pamiaškańnie apiačatali, a dakumientacyju ŭziali na vyvučeńnie. Pa vynikach pravierki kniharniu raśpiačatali. Ale vynieśli surovaje pakarańnie za pracu bieź licenzii Ministerstva infarmacyi.
Pa vynikach pravierki kniharniu aštrafavali amal na 1 miljard rubloŭ – takoj była suma prodažaŭ knih za hod. Spahaniać hetyja hrošy buduć praz sud.
Ułaśnik kniharni Ihar Łohvinaŭ adznačyŭ, što za hod jon vosiem razoŭ źviartaŭsia ŭ Mininfarm pa licenziju. I kožny raz jamu admaŭlali. Adna z admoŭ była źviazana z tym, što Ihar… niapravilna ŭkazaŭ paštovy indeks.
Letaś Ministerstva infarmacyi zabrała ŭ vydaviectva «Łohvinaŭ» licenziju za vypusk alboma «Pres-fota Biełarusi 2011». Albom pryznali nibyta ekstremisckim.
Kniharnia źjaŭlajecca miescam šmatlikich knižnych prezientacyj i hranična značnaj dla nacyjanalnaj kultury i litaratury prastoraj.
Ciapier kniharnia viarnułasia da pracy ŭ raniejšym režymie.
U 2012 za raspaŭsiud biełaruskich knižak asudzili Alesia Jaŭdachu. Jon dasyłaŭ knihi praz poštu. Najezd na jaho pačaŭsia paśla taho, jak jon staŭ raspaŭsiudžvać vydańnie «Maładafrontaŭcy». U jahonaj dziejnaści padatkovaja inśpiekcyja i Departamient finansavych rasśledavańniaŭ uhledzieli niezakonnaje pradprymalnictva, zaviali spravu. U lipieni 2012 hoda Aleś Jaŭdacha byŭ pakarany hodam abmiežavańnia voli biez nakiravańnia ŭ papraŭčyja ŭstanovy (h.zv. «chatniaja chimija», termin pačaŭ adbyvać z 15 kastryčnika 2012). Taksama było pastanoŭlena spahnać ź jaho 54 młn 536 tys. 600 rubloŭ kampiensacyi škody i 2 młn 726 tys. 830 rubloŭ dziaržaŭnaha myta.
