U Minsku ŭ 2015 hodzie płanujecca pašyryć mahčymaści dyfierencyjavanaj apłaty prajezdu ŭ hramadskim transparcie, paviedamiŭ na pres-kanfierencyi 17 śniežnia namieśnik hienieralnaha dyrektara dziaržaŭnaha pradpryjemstva «Minsktrans» Andrej Paploŭka.
Pavodle jaho słoŭ, novaja sistema apłaty prajezdu z vykarystańniem bieskantaktnych smart-kartak (BSK), validataraŭ i elektronnych kampościeraŭ dazvalaje ŭkaraniać bolš hnutkuju taryfnuju palityku.
«Pierš za ŭsio ŭ miežach raźvićcia sistemy płanam pavyšeńnia jakaści pracy hramadskaha transpartu na 2015 praduhledžanaja dyfierencyjavanaja sistema apłaty prajezdu ŭ horadzie i palapšeńnie zručnaści dla našych pasažyraŭ u płanie mahčymaściaŭ papaŭnieńnia BSK u terminałach samaabsłuhoŭvańnia. Ukaranionaja sistema patencyjalna, z pryčyny svaich techničnych mahčymaściaŭ, dazvalaje realizoŭvać praktyčna ŭsie taryfy, jakija mahčyma prydumać. Ale heta nie aznačaje, što heta zaraz i źjavicca, tamu što, zhodna z paradkam uvodu novych prajaznych taryfaŭ, my pavinny atrymać uzhadnieńni ŭ vyšejšaj arhanizacyi, u Ministerstva ekanomiki, u Miniusta, u Nacbanka», — skazaŭ Paploŭka.
Jon nie vyklučyŭ, što taryfy na prajezd u zaležnaści ad praciahłaści ci dalokaści pajezdak, a taksama vychadnoha dnia mohuć źjavicca ŭžo ŭ nastupnym hodzie, «kali budzie vyznačanaja i ŭzhodnienaja ekanamičnaja i inšaja metazhodnaść».
Namieśnik hiendyrektara «Minsktransa» nahadaŭ, što abstalavanyja novymi sčytvalnymi prystasavańniami 2.500 adzinak ruchomaha transpartu i 315 turnikietaŭ u mietro, a taksama šeść sastavaŭ ciahnikoŭ haradskich linij. Ustanoŭlenyja prykładna 15 tys. prystasavańniaŭ sčytvańnia (validataraŭ) i pryblizna 8 tys. elektronnych kampościeraŭ. Vykarystoŭvajecca prykładna 500 prystasavańniaŭ dla kantraloraŭ. Vyrablena pryblizna 900 tys. BSK, stvoranyja 330 punktaŭ ich papaŭnieńnia.
«Ukaranieńnie hetaj sistemy dazvoliła pavysić matyvacyju apłaty prajezdu za košt praviadzieńnia bolš hnutkaj taryfnaj palityki, pavialičyć efiektyŭnaść i hnutkaść kantrolu paŭnaty apłaty prajezdu, źnizić raschody za košt skaračeńnia štatu kanduktaraŭ i drukavańnia papiarovaj pradukcyi, aptymizavać maršrutnuju sietku», — zaznačyŭ Paploŭka.
