Niahledziačy na ciažkaści i prablemy, biełarusy z hodnaściu pražyli hety hod, zajaviŭ Alaksandr Łukašenka 17 śniežnia na cyrymonii ŭručeńnia dziaržaŭnych uznaharod.
«Hety hod byŭ niaprostym, — cytuje Łukašenku pres-słužba prezidenta. — Kala samych našych miežaŭ raptam zahareŭsia novy haračy punkt. Radykalnym čynam źmianilisia mižnarodnyja adnosiny. Zdajecca, čałaviectva ŭvachodzić u čarhovy pieryjad napružanaści i supraćstajańnia».
Biełarusy, pavodle słoŭ kiraŭnika dziaržavy, nie admovilisia ad pryncypaŭ dobrasusiedstva, zachavali mir i stabilnaść u hramadstvie.
Łukašenka padkreśliŭ, što ŭ 2014 hodzie ŭ krainie byŭ sabrany «niebłahi ŭradžaj ziernievych i inšych kultur», arhanizavanaja charčovaja biaśpieka krainy, uviedzienyja ŭ stroj novyja i madernizavanyja pradpryjemstvy, u vyniku čaho pramysłovy patencyjał pavialičany amal na paŭtary tysiačy arhanizacyj. «U biełaruskaj stalicy i rehijonach za hod pabudavanyja žyłyja masivy i sacyjalna-kulturnyja abjekty. Upieršyniu za ŭsiu historyju sučasnaj Biełarusi my prymali ŭ siabie bujnoje mižnarodnaje pieršynstvo — čempijanat śvietu pa chakiei», — skazaŭ jon.
Pry hetym kiraŭnik dziaržavy vyznačyŭ, što Biełaruś svaimi dasiahnieńniami «abaviazanaja tym, chto ŭparta pracuje, kab zrabić žyćcio lepšym».
Dziaržaŭnych uznaharod udastojenyja pradstaŭniki roznych prafiesij, u tym liku rabotnik AAT «BiełAZ», kiraŭnik filijała «Siervaluks Ahra» SZAT «Siervaluks». Asobna Łukašenka adznačyŭ zasłuhi biełaruskich budaŭnikoŭ, u pryvatnaści kalektyvy AAT «Hrodnažyłbud», Białynickaj pierasoŭnaj miechanizavanaj kałony № 241, Bresckaha budaŭničaha tresta № 8, Minskaha ŭpraŭleńnia miechanizacyi № 79.
Vysokich dziaržaŭnych uznaharod udastojenyja supracoŭniki Ministerstva ŭnutranych spraŭ, pradstaŭniki Uzbrojenych sił i Ministerstva pa nadzvyčajnych situacyjach; hanarovych zvańniaŭ i dziaržaŭnych uznaharod — viadučyja piedahohi, rabotniki ŚMI, dziaržaŭnyja słužačyja i dziejačy kultury. Adznačanyja pośpiechi biełaruskaj vyšejšaj adukacyi, miedykaŭ, spartsmienaŭ. Uhanaravanyja akciory Bresckaha akademičnaha teatra dramy imia Leninskaha kamsamoła Biełarusi, kiraŭnik arkiestra narodnych instrumientaŭ Mahiloŭskaj abłasnoj fiłarmonii.
