Słavuty kampazitar choča, kab haradziency vykanali tvor «A chto tam idzie» u vialikim kancercie ŭ Biełaruskaj dziaržaŭnaj filarmonii z nahody jaho jubileju.
U vialikaj imprezie, zładžanaj u honar narodnaha artysta Biełarusi, voźmuć udzieł salisty biełaruskaj Opery, dziaržaŭny kamierny arkiestr Biełarusi, kampazytar Ihar Ałoŭnikaŭ dy inšyja znakavyja asoby ŭ biełaruskaj klasyčnaj muzycy. Zaplanavanaja i rok-častka, jakuju pradstavić hurt Dzieciuki.
«Ja nie bajusia, što hetaja kamanda budzie na scenie lišniaj. Naadvarot – vielmi cikava pahladzieć jak jany vyhladajuć i hučać. Dumaju, što i dla publiki heta budzie pryjemnaja niečakanaść», – adznačyŭ Siarhiej Kartes
u kamentary dla Tuzin.fm. Haradzienski hurt syhraje svaju versiju tvora «A chto tam idzie», jaki Siarhiej Albiertavič napisaŭ na słovy Janki Kupały dla kinafilmu «Raskidanaje hniazdo» (1982). Kampazytar daŭ asabistuju zhodu na vykarystańnie jaho muzyki ŭ prajekcie «Re:Pieśniary», dla jakoha byŭ zapisany varyjant pieśni ŭ vykanańni haradzienskaha hurtu.
Fota Budzma.by
Miarkujecca, što ich vystup adbudziecca pry kancy pieršaha adździaleńnia. Admysłova da hetaha vystupu Dzieciuki rychtujuć novuju versiju kampazycyi, a taksama jašče adzin nievialički siurpryz.
Kancert adbudziecca 21 lutaha 2015 ŭ vialikaj zali Biełaruskaj dziaržaŭnaj filarmonii.
Siarhiej Kartes pa pravu ličycca klasikam biełaruskaj muzyki. Jon naradziŭsia ŭ 1935 hodzie ŭ Čyli, pieršyja 20 hod pražyŭ u Arhientynie, a ŭ Biełaruś jaho siamja pierajechała ŭ 1947 hodzie. Tut jon skončyŭ kanservatoryju. Svaje pieršyja tvory napisaŭ u 50-ch hadach. Byŭ dyryžoram i zahadčykam muzyčnaj častkaj u Teatry junaha hledača, Teatra imia Janki Kupały, muzyčnym redaktaram «Biełaruśfilmu», u 1991-2002 uznačalvaŭ biełaruski teatr opery i baleta. U liku jaho samych značnych tvoraŭ – opery «Džardana Bruna», «Jubilej», balet «Apošni inka», aratoryja «Pamiaci paeta» pavodle Janki Kupały, muzyka da takich spektaklaŭ jak «Serca na dałoni», «Kłop», «Trybunał», «Viečar» i kinafilmaŭ «Čorny zamak Alšanski», «Vaźmu tvaju bol», «Pryhody ŭ horadzie, jakoha niama» dy jašče bieźlič tvoraŭ.
