Hałoŭnaja tema dla abmierkavańnia ŭ Minsku – imklivy rost kursaŭ valut. Niahledziačy na zajavy Alaksandra Łukašenki pra toje, što «devalvacyi nie budzie», biełarusy pierastrachoŭvajucca i pieravodziać svaje aščadžeńni ŭ dalary.
U adździaleńni «Biełarusbanka» na vulicy Kalinina ŭ čarzie sabrałasia kala 20 čałaviek, bolšaść albo zakryvaje rublovy depazit, kab nabyć valutu, albo adrazu kuplaje valutu. Kala 12:00 dalary i jeŭra skončylisia, z taho času pradajecca tolki zdadzienaja valuta.
Padobnaja situacyja i ŭ «Biełarusbanku» na praśpiekcie Niezaležnaści kala płoščy Pieramohi. Čarha klijentaŭ vychodzić za miežy adździaleńnia, hrošy ŭ bankamacie skončylisia.
Internet-karystalniki paviedamlajuć pra adsutnaść valuty ŭ mnohich abmieńnikach. Tam, dzie dalary jość u prodažy, ich kurs mocna adroźnivajecca ad aficyjnaha.
U bolšaści abmieńnikaŭ «Biełarusbanka» paśla abieda kurs byŭ uźniaty da 11 490 rubloŭ. «Bank Maskva-Minsk», «BiełVEB», «BSB Bank» pradajuć dalary pa 11 500 rubloŭ. Rekardsmien – «Absalutbank» z 11 600 rublami.
Jašče ŭčora ranicaj amierykanskuju valutu možna było svabodna nabyć pa 11020-11050 rubloŭ. Takim čynam za sutki kurs faktyčna vyras na 4%.
Nacbank nie reahuje na źmieny na valutnym rynku nijak. Aficyjny kurs dalara pa-raniejšamu pryrastaje na 10 rubloŭ štodzień, zaŭtra jon budzie składać 10890 rubloŭ.
Roźnica pamiž aficyjnym kursam i kursam u abmieńnikach dasiahaje 6,5%, situacyja blizkaja da ŭtvareńnia dvuch paralelnych kursaŭ.
