Paśla abvału rasijskaha rubla biełarusy niadoŭha čuchali patylicy: sprytna pamianiali «našy» rubli na «nie našy» i rvanuli za tavarami ŭ bližejšyja rasijskija harady. Abvał valuty krainy-susiedki sparadziŭ spažyviecki bum z boku našych suajčyńnikaŭ.
fota ilustracyjnaje
Naprykład, navat u pracoŭnyja aŭtorak i sieradu kala bujnych handlovych punktaŭ Klincoŭ było bieźlič aŭtamabilaŭ ź biełaruskimi numarami. Svaimi ŭražańniami ad našeścia suajčyńnikaŭ z nami padzialiŭsia žychar Homiela Kirył, jaki pracuje ŭ Klincach. Tudy na «zakupy» jeduć u asnoŭnym na ŭłasnych aŭtamabilach – na aŭtobusie nie šmat vyviezieš. Kali jechać za niejkimi drobnymi rečami, to kvitok na aŭtobus Homiel-Klincy kaštuje 40 tysiač. Na aŭtamabili vyhadna jašče i tym, što zapravicca možna na bližejšaj rasijskaj AZS u dva razy tańniej, čym na biełaruskim baku. Heta ŭžo ŭziali na ŭzbrajeńnie kantrabandysty – štodnia DAI niasie vartu na darohach z Rasii, i maje dobry «ułoŭ» — zatrymlivaje tych, chto viazie bolš čym 100 litraŭ dazvolenaha paliva.
Miažy – surjoznaj, z pravierkami i sabakami, pamiž RB i RF niama, tolki staić punkt propusku, dzie pamiežniki praviarajuć najaŭnaść pašpartoŭ. Nu i mohuć vybaračna niekaha pravieryć – ci nie pravozić zabaronienyja rečy.
Jechać lepš adrazu z rasijskimi rublami. Praŭda, nie ŭsim šancuje znajści ich u homielskich abmieńnikach, dzie jany karystajucca padvyšanym popytam.
Krama bytavoj techniki «Eldarada» u Klincach — samaja papularnaja ŭ biełarusaŭ zaraz. U čarzie tut u budny dzień možna prastajać da čatyroch hadzin. Pradavački narakajuć, što ŭ vychodnyja naohuł pracavać niemahčyma – takija natoŭpy pakupnikoŭ-biełarusaŭ. «Eldarada» zaraz padobnaja na vialiki skład, a nie kramu: paŭsiul – zapakavanyja skryni ź ladoŭniami dy televizarami — «płazmami». Apošnija biełaruskija pakupniki biaruć spraŭna, i navat pa niekalki. Navat samaja mienšaja pa dyjahanali «płazma» — na sto dalaraŭ tańniej, čym u Homieli. Čym vyšejšy košt televizara – tym bolšaja ekanomija. Na pakupcy 2-mietrovaj ladoŭni možna zekanomić da 500 dalaraŭ.
«Na reštu» u kramie biaruć miksiery, mikrachvaloŭki, fieny, prasy i multyvarki. Biełaruskich «Atłantaŭ» i «Haryzontaŭ» u «Eldarada» praktyčna niama. Jany tannyja, tamu pieršyja pajšli z małatka. Praŭda, znajści biełaruskija brendy, jakija tut značna tańniej, čym na radzimie, možna ŭ maleńkich pryvatnych kramach. Jak i biełaruski abutak.
Dziva, ale mužčynskija boty «Marko» kaštujuć udvaja tańniej, čym u krainie-vytvorcy, rodnaj Biełarusi. Tańniej možna znajści i biełaruski trykataž, bializnu.
Tolki pradaŭcy hetych kram sumujuć – biełarusy svaje ž boty i bializnu čamuści masava nie raźbirajuć, usia ŭvaha skancentravana na bytavuju techniku.
Pradukty nie našmat tańniej, čym u Homieli, i na ich uvahu pakupniki ź Biełarusi nie akcentujuć. Darečy, nie zaŭvažna ŭ prodažy biełaruskich kiłbas, ale małočnyja vyraby prysutničajuć na palicach kram.
Tannyja tut niekatoryja leki, pryčym mnohija pradajucca biez receptu (na jakija ŭ Biełarusi treba mieć recept). Dachodzić da roźnicy ŭ koštach u piać razoŭ. Tak, naprykład, kali «Pankreacin» u Biełarusi miascovaj vytvorčaści kaštuje 25 tysiač, to ŭ Rasii z 5 tysiač u pieraraźliku z rasijskich rubloŭ. Leki ad alerhii «Nasabiek» u Homieli nabyvajucca pa receptu i za 80 tysiač, a ŭ Klincach ich možna znajści za 20 tysiač i pryčym biez receptu.
Choć rasijskija vydańni siońnia i pišuć, što ŭ Rasii niekatoryja aŭtamabilnyja dylery prypynili prodažy, mnohija biełarusy paśpieli nabyć sabie novyja aŭtamabili. Tak, u Homieli zaraz niebyvałyja čerhi na rehistracyju novych aŭto z Rasii, supracoŭniki rehistracyjnaha adździełu DAI pracujuć «non-stop».
Hamialčuk Arkadź pachvaliŭsia nam novaj, 2014 hodu vypusku «Škoda Rapid». Pa jaho słovach, nabyŭ novy aŭtamabil u RF za amal 12 tysiač dalaraŭ. «A ŭ nas taki kaštuje na 5 tysiač daražej!», — padkreśliŭ mužčyna.
Tym časam, valuta (i rasijskija rubli, i dalary) karystajecca zaraz u žycharoŭ Homiela popytam uzoru 2011 hodu. Kab nabyć jakuju «sotku baksaŭ», pryjdziecca abyści dziasiatak abmieńnikaŭ pa ŭsiamu horadu. I nie fakt, što paščaścić.
