«Doktar Polik byŭ zaprošany ŭ EHU jak źniešni kansultant, i siońnia jaho finansavaja kampiensacyja składaje da 5% biudžetu EHU. Vierahodna, heta adzin z samych vysokich zarobkaŭ u akademičnym siektary va Uschodniaj Jeŭropie». Adnym z pretendentaŭ na pasadu novaha rektara EHU źjaŭlajecca Devid Hary Polik, suprać jakoha vystupajuć biełaruskija studenty. Prezident Asacyjacyi Vypusknikoŭ EHU Sierž Charytonaŭ vystupiŭ z artykułam na kyky.org, u jakim tłumačyć, čamu.
Ja nikoli nie dumaŭ, što mnie daviadziecca pisać tekst nakštałt hetaha. Ale ciapier ja akazaŭsia ŭ situacyi, u jakoj mnie prychodzicca ŭziać na siabie adkaznaść i pahavaryć z vami na temu, jakaja tyčycca kožnaha čałavieka, nieabyjakavaha da budučyni adukacyi ŭ Biełarusi. Chacieŭ by pahavaryć ab prajekcie, dziakujučy jakomu ja znajšoŭ svaich lepšych siabroŭ, a taksama paznajomiŭsia ź vialikaj kolkaściu ludziej, jakich časta baču ŭ lepšych miescach hetaha śvietu, i pra pieramohi jakich mnie zaŭsiody pryjemna daviedvacca — tamu, što ŭsie jany vielmi hodnyja. Ja chaču abmierkavać z vami budučyniu miesca, dzie ja sustreŭ krychu bolš za tysiaču śvitankaŭ i zachodaŭ, zdaŭ niekalki dziasiatkaŭ ekzamienaŭ (jak akademičnych, tak i tych, jakija navučyli mianie čałaviečnaści, siabroŭstvu, pamiarkoŭnaści, lubovi). Dziakujučy hetamu miescu ja ŭbačyŭ niekalki snoŭ na haradskoj płoščy Vilni, zimovaje mora i jašče šmat taho, čaho ŭbačyć ja niekali navat nie čakaŭ. Ja chacieŭ by pahavaryć pra EHU — prajekt, jaki na praciahu ŭsiaho adychodziačaha 2014 hoda hublaŭ reputacyju miesca, adkrytaha dla ŭsich, hetak ža imkliva, jak padała cana na naftu ŭ apošnija tydni. Ja tolki što pravieryŭ — užo pa $62,71, a niadaŭna była pa sotcy.
Ja aścierahajusia, što my staim pierad takoj pieramienaj u EHU, paśla jakoj u im nie zastaniecca toj atmaśfiery, u jakoj ja i mnohija inšyja ludzi akazalisia, pryjechaŭšy tudy zialonymi škalarami viasnoj 2007 hoda. Vierahodna, paśla rašeńnia, pamyłkova pryniataha ŭ bližejšyja tydni, univiersiteta nie zastaniecca zusim — tamu što jaho duch budzie stračany va ŭhodu kamiercyjnym bačańniam asobnaha čałavieka. Jon mała što viedaje pra Biełaruś, pra pavietra na Kastryčnickaj letniaj ranicaj u subotu, pra Pacu-Vacu ci pra toje, čaho ŭsim dziaŭčynkam chočacca, kali jabłyni ćvituć, i ja pryjdu da ciabie z kvietkami. Zhodna z abnoŭlenym Statutam, u bližejšyja dni mižnarodnaja Kiraŭničaja rada EHU pavinna vyznačycca z kandydaturaj nastupnaha rektara EHU, nakiravać jaje na razhlad Ahulnaha schodu suzasnavalnikaŭ / GAPO, jakoje i abvieścić kančatkovaje rašeńnie. Hety praces adbyvajecca va ŭmovach nieabhruntavanaj nieprazrystaści, usieahulnaj zaniepakojenaści i značnaj apatyi adnosna vynikaŭ pracesu — tamu, jak Prezident Asacyjacyi vypusknikoŭ pazaŭčora, ja nakiravaŭ siem pytańniaŭ da Ahulnaha schodu suzasnavalnikaŭ, jakija tyčacca prazrystaści pracedury vybaraŭ.
Samym važnym siarod pytańniaŭ, nakiravanych mnoju da GAPO, ja liču stupień hatoŭnaści jaho ŭdzielnikaŭ u abstavinach, jakija skłalisia, uziać na siabie adkaznaść za lehitymnaść pracesu vybaraŭ rektara. Ja nie dumaju, što jość niejki sens chavać ahulnaje adčuvańnie ludziej, tak ci inakš zacikaŭlenych u losie EHU, pra toje, što rašeńnie daŭno pryniata, i vybary — heta praces, zatočany pad lehitymizacyju Hary Polika (mienavita, sapraŭdnaje imia kandydata Garry David Pollick).
Chto taki Hary Polik
Doktar Polik byŭ zaprošany ŭ EHU jak źniešni kansultant, i na siońnia jaho finansavaja kampiensacyja składaje, pa prybliznych padlikach ź miedyjnych krynic, da 5% biudžetu EHU. Vierahodna, heta adzin z samych vysokich zarobkaŭ u akademičnym siektary va Uschodniaj Jeŭropie. Časova zaprošany antykryzisny mieniedžar za šeść miesiacaŭ svajoj pracy nie zmoh pakazać jakich-niebudź značnych vynikaŭ, roŭna jak i pradstavić zbałansavanaha biudžetu, i pa-raniejšamu «prymiarajecca» da adnosna nievialikaha univiersiteta. Kali ja pracavaŭ u HR-kansałtynhu, nas vučyli, što jość dva hałoŭnyja pytańni, jakija dapamahajuć acanić prafiesijanalizm mieniedžara:
1) Na jakija zadačy vy pryjšli?
2) Jakija ź ich vam udałosia realizavać?
Za čas, vydatkavany na vyvučeńnie minułaha doktara Polika, mnie ŭdałosia vyśvietlić padrabiaznaści jaho pracy ŭ BSC. Atrymałasia cikavaja spend-o-rama ź Lebiadzinym vozieram, dvuma rejtynhami Forbes i adčuvańniem dežaviu, jakoj ja chaču padzialicca z vami ciapier.
Praca doktara Polika ŭ kaledžy Birmingham-Southern
Za šeść hadoŭ kiravańnia Birmingham-Southern College ŭ Birminhiemie (Ałabama) Polik zdoleŭ stać trecim u śpisie najbolš vysokaapłatnych akademičnych menedžeraŭ u ZŠA pa viersii Forbes, zahnać u daŭhi viadučuju liberal arts school i advieści jaje ŭ śpis škoł z najbolšymi finansavymi ciažkaściami — znoŭ ža, pa viersii amierykanskaha Forbes. Polik nastojvaje na tym, što jon nie viedaŭ pra situacyju, jakaja skłałasia, i prablemy Birmingham-Southern paŭstali jašče da taho, jak u lipieni 2004 hoda jon pryniaŭ kiraŭnictva univiersitetam. Piareču. Za 28 hadoŭ mieniedžmient pad kiraŭnictvam prafiesara Niła Bierta (Neal Berte), papiarednika Polika, pieratvaryŭ BSC z rehijanalnaha kaledža ŭ adnu ź viadučych škoł liberal arts u ZŠA, sfarmavaŭ zbałansavany biudžet, pavialičyŭ apieracyjny fond univiersiteta z 11 da 136 miljonaŭ dalaraŭ, pačaŭ i zaviaršyŭ budaŭnictva dziesiaci karpusoŭ i ŭ dva razy pavialičyŭ nabor studentaŭ. U pačatku 2000-ch aŭdyt biudžetu Bierta pakazaŭ bolš za miljon dołaraŭ dachodaŭ.
Doktar Polik vyrašyŭ, što dobrym mietadam pa rašeńni prablemy stanie farmiravańnie univiersiteckaj kamandy pa amierykanskim futbole i inviestavańnie 13 miljonaŭ dalaraŭ u budaŭnictva z nula stadyjona dla trenirovak za košt univiersiteckaha biudžetu.
Bolš za toje, dumki vypusknikoŭ BSC, jakija mnie ŭdałosia daviedacca, jak adna sychodziacca na tym, što Polik źmianiŭ identyčnaść škoły — zamiest fokusu na navuku jana pieratvaryłasia ŭ sportacentryčny kaledž, dzie rola liberal arts adyšła na druhi płan va ŭhodu athletics.
Sport — heta čaściakom niadrenny sposab pryciahnuć finansavuju padtrymku: zamožnyja vypuskniki lubiać układvacca ŭ takija rečy, kab potym prosta pasiadzieć ź siabrami na trybunie padčas hulni. Dla niekatorych kaledžaŭ ŭ ZŠA ci Brytanii heta sapraŭdy pracuje, ale tolki nie dla kampusaŭ, jakija absalutna nie prystasavanyja da hetaha. Budaŭnictva stadyjona, pošuk i apłata trenieraŭ — usio heta navat nie akuplaje siabie, kali kamanda nie ŭ śpisie lepšych u krainie.
Pavodle infarmacyi The Chronicle, na vychadzie z Birmingham-Southern Polik umudryŭsia atrymać $2.312.098 ad univiersiteta, jaki jon pakinuŭ z 10 miljonami dalaraŭ biudžetnaha deficytu. Z hrošaj, atrymanych Hary ad BSC paśla sychodu, amal paŭmiljona byli fiksavanym zarobkam, nie abkładanymi padatkam dachodami i adterminavanaj kampiensacyjaj, pry hetym astatnija $ 1.790.000 byli vyznačanyja jak «other pay». Darečy, amal paŭmiljona fiksavanaj kampiensacyi — heta na toj momant bolš, čym było ŭ prezidenta susiedniaha Samford University, jaki ŭ try razy bolšy, čym BSC, u jakim pracavaŭ doktar Polik (nahadaju, što ciapierašni ŭzrovień kampiensacyi Polika u try razy vyšejšy, čym ŭ rektara Vilnius Universitetas — čałavieka z absalutna nieparaŭnalnym maštabam kampietencyj i adkaznaści).
Siarod inviestycyj Polika ŭ raźvićcio Birmingham-Southern College akazałasia budaŭnictva vielizarnaha voziera na terytoryi kampusa…
Davioŭšy doŭh univiersiteta da $22 100 000 da 2008 hoda (a svaju štohadovuju rektarskuju kampiensacyju pavialičyŭšy da $495 461), Polik ŭ try razy abvaliŭ košt bondaŭ kaledža, za šeść hadoŭ svajoj pracy jon patraciŭ amal pałovu nazapašanych za 30 hadoŭ hrošaj z fondu kaledža, vyklikaŭ źnižeńnie kredytnaha rejtynhu univiersiteta i žorstkuju krytyku finansavaj spravazdačnaści kaledža z boku Moody's Investors Service.
Čym dalej raźvivaŭsia kanflikt z-za finansavych prablem, tym bolš vyraznymi stanavilisia maštaby sistemnaha pravału doktara Polika.
U vyniku Polik pryniaŭ rašeńnie skaracić piać adukacyjnych prahram i amal čverć supracoŭnikaŭ, kab vyštukavać $6 000 000 na kampiensacyi pakinutym rabotnikam kaledža i pamienšyć ich zarpłaty na 10-35%. Usio heta adbyvałasia biez razumieńnia i raskryćcia detalaŭ finansavaj spravazdačnaści, ahučvańnia realnych pryčyn kryzisu kaledža.
Ja liču niedapuščalnym, kab taki čałaviek, jak Hary Polik, uznačaliŭ miesca, u jakim naradžalisia našy mary i lepšyja pačynańni. Nie jak Prezident Asacyjacyi (heta ž birka, ad jakoj ja nie budu inšym, jaje vielmi prosta źniać i nadzieć nazad), ale prosta jak čałaviek, jaki pryvyk havaryć praŭdu, źviartajusia da vas z prośbaj raspaŭsiudzić hetuju infarmacyju i nie dapuścić abrańnia Hary Devida Polika novym rektaram Jeŭrapiejskaha Humanitarnaha Univiersiteta.
