U elektronnym vydaviectvie «Piaršak» miedyjałabaratorii 34mag.net vyjšli «Vałacuhi» Alaksieja Tałstova, raman – padarožža pa Indyi dy Niepale razam z prafiesijnymi daŭnšyftarami z usiaho śvietu. Spampavać knihu možna biaspłatna.
«Vałacuhi» – heta treci raman piśmieńnika, muzyki i mastaka Alaksieja Tałstova. U apošnija hady Tałstoŭ šmat času pravioŭ u Indyi dy Niepale, dzie sustreŭsia z sotniami takich ža padarožnikaŭ i vałacuh z usiaho śvietu. «Jość ludzi, jakija naturalna tam zavisajuć. Niechta ščaślivy pracavać sadoŭnikam ci ŭ Kanadzie truby kłaści – i potym pryjazdžać na adpačynak. Jość tyja, u kaho zryvaje dach, jany dochnuć ad narkotykaŭ, ad taho, što niama kudy viartacca. Byŭ momant, kali ja sam byŭ da hetaha blizki», – uspaminaje aŭtar u razmovie z 34mag.
Pa sutnaści, raman «Vałacuhi» – heta sproba asensavać nabyty dośvied daŭnšyftynhu. «Hety tekst – miedytatyŭnaje razvažańnie bekpekiera, jaki sarvaŭsia adnojčy ŭ vialikaje padarožža dy nie zdoleŭ znajści darohu dadomu, – adznačajuć vydaŭcy ramana. – Liryčny hieroj ničym nie vydaje svajoj nacyjanalnaści, jon hramadzianin śvietu, jaho ekzistencyjnyja vahańni nijak nie źviazanyja z ułasnym pachodžańniem i koleram pašparta. Z hetaha punktu hledžańnia raman padajecca nam svojeasablivym łeveł-apam dla biełaruskaj litaratury, zvykłaj analizavać siabie vyklučna praz nacyjanalny kantekst».
Elektronnuju viersiju knihi možna skačać u roznych farmatach na multyłejble «Piaršak».Papiarovuju viersiju knihi, vydadzienaj u sieryi «Biblijateka 34mag», možna nabyć u kniharni «Łohvinaŭ», na «Kaladnym kirmašy» ŭ halerei «Ŭ» z 23 da 31 śniežnia, a taksama na Jam Market 25 śniežnia.
Spampavać raman «Vałacuhi» Alaksieja Tałstova
