U niadzielu, 14 śniežnia, bajeviki terarystyčnaj arhanizacyi «Boka Charam» uvarvalisia ŭ addalenuju viosku na paŭnočnym uschodzie Nihieryi. U vyniku dadzienaha napadzieńnia zahinuła pa mienšaj miery 33 čałavieki i jak minimum 100 było skradziena — raspavioŭ adzin ź niešmatlikich žycharoŭ vioski, jakija zastalisia ŭ žyvych.
Pa jahonych słovach, terarysty zachapili žančyn i dziaciej ź vioski Humsury. «Paśla taho, jak jany zabili našych maładych chłopcaŭ, bajeviki zabrali našych žonak i dačok u pałon», – raspaviadaje žychar vioski.
Bajeviki «Boka Charam»
«Jany sabrali ludziej, rasstralali bolš za 30 čałaviek i zabrali bolš za 100 žančyn i dziaciej u dvuch hruzavych aŭtamabilach z adkrytym viercham. Taksama jany spalili dziaržaŭny miedycynski centr, damy i kramy», – raskazvaje miascovaja žycharka Majna Čybok. Napadzieńnie adbyłosia ŭ niadzielu, ale navina źjaviłasia tolki siońnia, paśla taho, jak tyja, chto zastaŭsia ŭ žyvych paśla ataki terarystaŭ, dabralisia da horada Majduhury.
Nahadajem, što raniej vialiki rozhałas atrymała vykradańnie bolš 200 dziaŭčatak sa škoły ŭ horadzie Čybok, što na poŭnačy Nihieryi, jakoje adbyłosia jašče ŭ krasaviku hetaha hoda. Tady hrupoŭka «Boka Charam» aficyjna ŭziała na siabie adkaznaść za heta, zajaviŭšy, što dziaŭčaty buduć pradadzienyja ŭ rabstva ci zamuž u inšyja afrykanskija krainy. Dahetul los dziaŭčat nieviadomy, a nihieryjskija ŭłady zajaŭlajuć, što robiać usio mahčymaje, kab znajści ich i viarnuć u ich siemji.
Miž tym, armija Kamieruna paviedamlaje, što joj było źniščana 116 nihieryjskich bajevikoŭ, jakija napali na adnu z kamierunskich vajennych baz, raźmieščanuju pobač ź nihieryjskaj miažoj. Miascovyja žychary raspaviali zamiežnym ŚMI, što ŭzbrojenyja bajeviki napali na pamiežny horad Amčyde ŭ sieradu: častka prybyła na dvuch aŭtamabilach, a taksama vialikaja kolkaść pieššu. Jany ŭvarvalisia na rynkavuju płošču, padpalili kramy i bolš za 50 damoŭ. Ni adna terarystyčnaja hrupoŭka nie ŭziała na siabie adkaznaść za hety napad, ale čynoŭniki abvinavacili bajevikoŭ nihieryjskaj arhanizacyi «Boka Charam». Heta ŭžo daloka nie pieršy vypadak, kali terarysty z poŭnačy Nihieryi praryvajucca na terytoryju Kamieruna i ŭčyniajuć tam akty hvałtu.
Nihieryjskija vajennyja kiraŭniki
Taksama cikavy toj fakt, što razam z navinami ab napadzieńni na viosku Humsury hramadskaść daviedałasia ab tym, što Nihieryjski vajenny sud u sieradu prysudziŭ 54 svaich sałdat da śmiarotnaha pakarańnia za miaciež paśla taho, jak jany admovilisia ŭdzielničać u vajennaj apieracyi suprać isłamistaŭ z «Boka Charam» na paŭnočnym uschodzie.
«54 byli prysudžanyja da śmiarotnaha pakarańnia, a piaciora byli apraŭdanyja», — skazaŭ viadomy advakat i abaronca pravoŭ čałavieka Fiemi Fałana paśla vajennaha suda, jaki pačaŭsia 15 kastryčnika i byŭ praviedzieny za začynienymi dźviaryma. Žurnalisty nie dapuskalisia ŭ zału suda, a paśla jaho vajennyja davali nijakich kamientaroŭ na hetuju temu.
U padobnym vypadku ŭ vieraśni, 12 sałdat byli prysudžanyja da śmiarotnaha pakarańnia za miaciež paśla abstrełu svajho kamandzira ŭ paŭnočna-ŭschodnim horadzie Majduhury, dzie nihieryjskija vojski zmahajucca suprać bajevikoŭ «Boka Charam».
U toj ža momant varta adznačyć, što pa šmatlikich paviedamleńniach zamiežnym ŚMI nihieryjskija vojski, jakija znachodziacca na linii fronta na paŭnočnym Uschodzie krainy, pastajanna skardzilisia, što im nie chapaje zbroi, a taksama amunicyi i abstalavańnia, nieabchodnaha dla paśpiachovaha zmahańnia z bajevikami «Boka Charam» u ich cytadeli.
Nihieryjskaje vojska
Radykalnyja isłamisty z arhanizacyi «Boka Charam», jaki viaduć baraćbu ź nihieryjskimi ŭładami ŭžo na praciahu piaci hadoŭ z metaj stvareńnia chalifata na poŭnačy Nihieryi, jak paviedamlajuć vajennyja ekśpierty z raznastajnych krynic, majuć u rasparadžeńni tanki, reaktyŭnyja hranatamioty i inšuju ciažkuju zbroju. U toj ža čas paviedamlajecca, što rehularnaja nihieryjskaje vojska na dadzieny momant pieražyvaje surjozny niedachop bojeprypasaŭ navat dla zvyčajnych šturmavych vintovak.
Paśla taho, jak bajeviki «Boka Charam» zachapili šerah haradoŭ na paŭnočnym uschodzie Nihieryi ŭ pačatku hetaha hoda, vajennyja paabiacali viarnuć usie stračanyja terytoryi. Nastup na pazicyi terarystaŭ było daručana vieści 7 dyvizii, jakaja bazirujecca ŭ Majduhury, ale na siońniašni momant z hetaha rehijona pastupajuć šmatlikija paviedamleńni ab tym, što vojski admaŭlajucca zajmać bajavyja pazicyi.
Tak, žonki sałdat ładzili akcyi pratestu za miežami vajennaj bazy, sprabujučy spynić svaich mužoŭ ad adpraŭleńnia ŭ zonu kanfliktaŭ biez naležnaj amunicyi i zapasaŭ bojeprypasaŭ. Sałdaty taksama pravodzili padobnyja demanstracyi, a adna hrupa vajennasłužačych stvaryła łahier pratestu na ŭskrainie horada Majduhury.
Sałdaty, asudžanyja da śmiarotnaha pakarańnia ŭ sieradu, słužyli ŭ padraździaleńni śpiecnazu, jakoje ŭ žniŭni nakiravali na poŭnač krainy z metaj viarnuć try stračanych harady ŭ vobłaści Borna, centram jakoj i źjaŭlajecca Majduhury.
U suviazi z hetaj situacyjaj vajennaje kiraŭnictva Nihieryi jašče raz zaklikała inšyja krainy, asabliva Vielikabrytaniju i ZŠA, akazać dziaržavie dapamohu ŭ supraćstajańni arhanizavanym strukturam bajevikoŭ «Boka Charam».
Daviedka. «Boka Charam» – radykalnaja isłamisckaja hrupoŭka. Zasnavanaja ŭ 2002 hodzie. Aficyjnaja arabskaja nazva: Džamaatu Achlis Sunna Lidda'avaci Val-Džychad, što značyć «Ludzi, jakija pryśviacili siabie raspaŭsiudžvańniu vučeńnia praroka i džychadu». Pieršapačatkova arhanizacyja była skancentravana na supraciŭleńniu zachodniaj sistemie adukacyi, što i dała joj siońniašniuju nazvu – «Boka Charam» na movie Chaŭsa aznačaje «zachodniaja adukacyja zabaroniena».
Bajavyja dziejańni hrupoŭka pačała ŭ 2009 hodzie, abjaviŭšy svajoj metaj stvareńnie isłamskaj dziaržavy na terytoryi Nihieryi. Zasnavalnik i lidar - Machamied Jusuf, zahinuŭ u 2009 hodzie ŭ zaklučeńni, jaho źmianiŭ Abubakar Šekau. Akramia tysiač zabojstvaŭ, a taksama zachopu ŭ pałon ludziej i rabavańnia viosak i miastečak, u śpisie akcyj hrupoŭki možna znajści napadzieńni na palicejskija ŭčastki i navat štab-kvateru AAN u stalicy Nihieryi – Abudžy. ZŠA pryznali «Boka Charam» terarystyčnaj hrupoŭkaj u 2013 hodzie.
Usiaho kala troch miljonaŭ čałaviek paciarpieli ad dziejańniaŭ hetych terarystaŭ. Bolš za 2000 čałaviek byli zabityja ŭ vyniku ich napadaŭ tolki ŭ hetym hodzie, u asnoŭnym u paŭnočna-ŭschodniaj Nihieryi, niedaloka ad miažy z Kamierunam.
