president.gov.by
Ukazam prezidenta № 607 ad 20 śniežnia 2014 hoda «Ab padatku na biržavyja apieracyi pa nabyćci zamiežnaj valuty» Alaksandr Łukašenka ŭzakoniŭ 30-pracentny zbor pry kupli valuty na Biełaruskaj valutna-fondavaj biržy. Zbor budzie bracca da 1 lutaha 2015 hoda.
Zhodna z dakumientam, apublikavanym pres-słužbaj prezidenta, płacielščykami padatku pryznajucca banki, jakija nabyvajuć zamiežnuju valutu na BVFB. Padatkovaj bazaj padatku pryznajecca suma hrašovych srodkaŭ u biełaruskich rublach, vypłačanaja za nabytuju zamiežnuju valutu.
Suma padatku «kampiensujecca płacielščykam arhanizacyjami i indyvidualnymi pradprymalnikami, na karyść jakich ažyćciaŭlajecca nabyćcio zamiežnaj valuty na tarhach».
Padatak «nie ŭklučajecca ŭ zatraty pa vytvorčaści i realizacyi tavaraŭ (rabot, pasłuh), majomasnych pravoŭ, što ŭličvajucca pry padatkaabkładańni, a taksama ŭ skład pazarealizacyjnych raschodaŭ».
Banki pieraličvajuć zamiežnuju valutu arhanizacyjam i indyvidualnym pradprymalnikam pry ŭmovie kampiensacyi imi sumy padatku ŭ poŭnym abjomie, zabiaśpiečvajuć uniasieńnie sum padatku ŭ respublikanski biudžet nie paźniej za treci pracoŭny dzień, što idzie za dniom praviadzieńnia tarhoŭ, ažyćciaŭlajuć kantrol za pravilnaściu vyličeńnia padatku.
Vyzvalajecca ad padatku nabyćcio zamiežnaj valuty na biržavych tarhach za košt biudžetnych srodkaŭ i «dla raźlikaŭ za tavary zhodna z dadatkam» (u im — nafta, haz i elektraenierhija).
Urad upaŭnavažany «ŭ vypadku źmianieńnia situacyi na valutnym rynku Respubliki Biełaruś pa ŭzhadnieńni z Nacyjanalnym bankam ustanaŭlivać inšy pamier staŭki padatku».
Ukaz nabyŭ moc z dnia padpisańnia.