Sustreča była pryśviečana situacyi ŭ finansavaj śfiery. Ministr Lilija Ananič painfarmavała redaktaraŭ pra apošnija kroki i ab pryjarytetach dziaržaŭnaj palityki na hetym etapie. Jana raskazała, što ŭrad i Nacbank ažyćciaŭlajuć nieabchodnyja miery, kab utrymać situacyju pad kantrolem i kab kraina «sustreła Novy hod spakojna».
Jana paabiacała, što dziaržaŭnyja struktury buduć vyčarpalna paviedamlać pra ŭsie nastupnyja kroki ŭ hetaj śfiery. U svaju čarhu, jana prasiła, kab ŚMI aśviatlali situacyju ŭzvažana, zychodziačy z nacyjanalnych intaresaŭ krainy.
Paśla hetaha adbyŭsia ažyŭleny, a momantami i vostry abmien dumkami pa pytańniach, jakija ŭjaŭlajuć uzajemny intares. Havorka vyjšła za miežy zadadzienaj ministram temy. Zakranalisia pytańni papravak u zakon ab ŚMI. Redaktar «Našaj Nivy», naprykład, siarod inšaha, uźniaŭ pytańnie pra los kniharni «łohvinaŬ».
U sustrečy brali ŭdzieł adkaznyja supracoŭniki ministerstva. Ad ŚMI prysutničali, akramia redaktara «Našaj Nivy», Iosif Siaredzič ad «Narodnaj voli», Juryj Zisier i Maryna Zołatava ad partała Tut.baj, Iryna Leŭšyna ad ahienctva BiełaPAN, redaktary «Biełorusov i rynka», «Komsomolskoj pravdy v Biełarusi», ahienctva «Interfaks», sajta Ej.by, «Arhumientov i faktov». Źviarnuła ŭvahu prysutnaść kiraŭnika biuro ahienctva «Rośsija siehodnia», partała Yandex.by. Byŭ zaprošany i pradstaŭnik Mail.ru, ale jon nie zmoh źjavicca.
