Studzień
U Biełaruś prybyvaje novapryznačany mitrapalit Pavieł.
Minskija rabotniki chutkaj dapamohi źbirajuć podpisy za pavyšeńnie zarobkaŭ. Ułady abiacajuć uźniać zarpłatu praź niekalki miesiacaŭ — i pratest haśnie.
U Kupałaŭskim teatry premjera «Pana Tadevuša».
Fanaty BATE pravodziać akcyju salidarnaści z Ukrainaj. Zaŭziataraŭ identyfikujuć i prysudžajuć da aryštaŭ.
Luty
U Sočy prachodzić zimovaja Alimpijada, jakaja skančvajecca tryumfam bijatłanistki Darji Domračavaj — try załatyja miedali! Aproč jaje ŭ spabornictvach pieramahajuć frystajlisty Ała Cupier i Anton Kušnir, a bijatłanistka Nadzieja Skardzina atrymlivaje bronzavy miedal.
Japonskaja karparacyja «Rakuten» kuplaje raspracoŭku biełaruskich prahramistaŭ, kampaniju «Vajbier», za $900 miljonaŭ.
Majdan biare ŭładu va Ukrainie, i Viktar Janukovič uciakaje ŭ Rasiju. Pieramoha była zdabytaja canoj žyćcia 106 achviaraŭ. Siarod ich — biełarus Michaił Žyźnieŭski.
Sakavik
U adkaz na pieramohu Majdanu Rasija ŭvodzić vojski ŭ Krym, błakujučy ŭkrainskija padraździaleńni. 16 sakavika na paŭvostravie prachodzić «refierendum», pavodle vynikaŭ jakoha Rasija ŭklučaje Krym u svoj skład.
Alaksandr Łukašenka admianiaje respublikanskija Dažynki. Śviata ciapier adznačajecca tolki na abłasnym i rajonnym uzroŭniach.
Miascovyja vybary prachodziać bieź nijakaha hramadskaha ŭzdymu.
Krasavik
Na volu vychodzić palitviazień Mikoła Aŭtuchovič. Jon pravioŭ za kratami 5 hadoŭ i 2 miesiacy — za piać znojdzienych pry vobšuku patronaŭ.
U Mastackim muziei adkryvajecca hrandyjoznaja vystava «Dziesiać stahodździaŭ mastactva Biełarusi», bolšaść ekspanataŭ jakoj pakazvałasia ŭpieršyniu.
Na ŭschodzie Ukrainy pačynajecca bajavyja dziejańni «sieparatystaŭ», jakija z dapamohaj Rasii płanujuć adarvać Danbas.
Maj
U Biełarusi prachodzić čempijanat śvietu pa chakiei. Pieramahaje Rasija.
Na volu vychodzić Andrej Hajdukoŭ, były ślesar «Naftana», asudžany za sprobu supracy z CRU.
Na «Jeŭrabačańni» pieramahaje aŭstryjskaja «žančyna z baradoj» Kančyta Vurst. U biełarusa Juryja Vaščuka (Tea) — 16-je miesca ŭ finale.
Červień
Pad vyhladam syna Janukoviča Alaksandru Łukašenku dazvaniŭsia rasijski žartaŭnik Vavan. Praź niekalki miesiacaŭ u adstaŭku sychodzić pamočnica kiraŭnika dziaržavy Natalla Piatkievič. Mahčyma, heta ŭzajemaźviazanyja padziei.
Z kałonii vyzvalajuć pravaabaroncu Alesia Bialackaha. Za «niavypłatu padatkaŭ» jon pravioŭ za kratami tysiaču dzion.
Lipień
Kiraŭnik «Biełnaftachima» Ihar Žylin aryštavany i źmieščany ŭ izalatar. Spłaciŭšy kampiensacyju, jon vychodzić na svabodu, adnak na svaju pasadu nie viartajecca.
Zbornaja Hiermanii stanovicca čempijonam śvietu pa futbole. U finale z Arhiencinaj usio vyrašaje hoł Marya Hiotce ŭ dadatkovy čas.
Jeŭrasajuz uvodzić sankcyi ŭ dačynieńni Rasii, patrabujučy spynić ahresiju suprać Ukrainy.
Sieparatysty źbivajuć małajzijski «Boinh» u niebie nad Danieckam. Zahinuła 298 čałaviek.
Žnivień
Rasija adkazvaje na sankcyi — uvodzić embarha na pastaŭku praduktaŭ ź Jeŭropy i ZŠA.
Aryštavanyja dvoje členaŭ savieta respubliki: mahiloŭski biznesmien Vital Kastahoraŭ i dyrektarka Viciebskaj brojlernaj ptuškafabryki Hanna Šarejka.
U Afrycy nabiraje abaroty epidemija lichamanki Eboła.
U Minsku pradstaŭniki Ukrainy i «DNR» damaŭlajucca pra spynieńnie ahniu. Pakrysie bai sucišvajucca.
Vierasień
8 vieraśnia śviatkujecca 500 hadoŭ pieramohi ŭ bitvie pad Voršaj. Na dziaržaŭnym uzroŭni data zastajecca niezaŭvažanaj.
Upieršyniu dva biełaruskija kłuby ŭdzielničajuć u jeŭrapiejskaj futbolnaj vosieni. BATE ŭstanaŭlivaje antyrekord Lihi čempijonaŭ pa roźnicy zabitych i prapuščanych miačoŭ — 2:24, adnak atrymlivaje pieramohu nad ispanskim «Atletykam». Minskaje «Dynama» ŭ Lizie Jeŭropy taksama zajmaje apošniaje miesca ŭ hrupie, zatoje pieramahaje italjanskuju «Fijarencinu».
U Minsku prajšoŭ «Mova Cup» — spartyŭny fiestyval na biełaruskaj movie, arhanizavany ajčynnymi spartsmienami.
Kastryčnik
Źjaŭlajecca novy palitviazień. Homielski aktyvist Juryj Rubcoŭ asudžany na 1,5 hoda «chimii» za abrazu sudździ.
U Minsku były achoŭnik sprabuje abrabavać abmieńnik i biare ŭ zakładnicy kasirku. Praź niekalki hadzin snajpier stralaje ŭ jaho i traplaje ŭ hałavu. Napadnik pamiraje ŭ balnicy na nastupny dzień.
Matč Biełaruś—Ukraina ŭ Barysavie pieratvarajecca ŭ demanstracyju salidarnaści. Fanaty z abiedźviuch krain razam śpiavajuć pra Pucina, skandujuć «Žyvie Biełaruś!» i «Słava Ukrainie!».
Alaksandr Łukašenka zahadvaje ŭźniać dazvolenuju chutkaść na darohach. Pa mnohich trasach ciapier možna jeździć 120 km/h, a nie 90 km/h.
Zakryvajucca moŭnyja kursy «Mova ci kava».
Listapad
U adstaŭku adpraŭleny staršynia Minharvykankama Mikałaj Ładućka. Na jaho miesca pryznačajecca były ministr ŽKH Andrej Šorac.
Reforma Ministerstva achovy zdaroŭja — ciapier kupić leki biez recepta stanovicca niemahčyma.
U Alaksandra Łukašenki źjaŭlajecca pres-sakratarka — televiadučaja BT Natalla Ejsmant (Kirsanava).
Śniežań
Sprava ab špijanažy. Vajskovy ahladalnik Alaksandr Alesin źmieščany ŭ izalatar KDB, ale nieŭzabavie vypuščany pad padpisku ab niavyjeździe.
Na volu vychodzić palitviazień Eduard Łobaŭ. Jon byŭ zatrymany za dzień da Płoščy-2010.
Finansavy kryzis u Rasii dakatvajecca i da Biełarusi. Kurs prodažu dalara vyrastaje na 30%, u kramach techniki pustyja palicy — nasielnictva skuplaje tavary pa starych cenach.
