Mahiloŭski abłasny sud razhladaje kryminalnuju spravu suprać byłoha namieśnika načalnika kryminalnaj milicyi UUS Homielskaha abłvykankama. Viačasłaŭ I. abvinavačvajecca ŭ atrymańni chabaru, padbuchtorvańni da chabaru i machlarstvie. Razam ź im sudziać rasijanina Andreja K., jakoha vinavaciać u dačy chabaru milicejskamu načalniku.
Pavodle materyjałaŭ śledstva, rasijanin z pravam na žycharstva ŭ Biełarusi dvojčy źviartaŭsia da Viačasłava I. pa dapamohu.
Pieršy epizod pieradačy hrošaj słužbovaj asobie za «pasłuhu» pryznany machlarstvam. Tady rasijanin pieradaŭ Viačasłavu $2 tysiačy za «vyrašeńnie pytańniaŭ». Na sudzie Andrej raskazaŭ, što ŭ pačatku studzienia 2014 jon adznačaŭ u Minsku ź siabrami svoj dzień naradžeńnia. Nie vyspaŭsia, sieŭ za rul. A tut jak na zło pa darozie spyniŭ inśpiektar DAI. I paniesłasia. Za jazdu napadpitku aštrafavali, pazbavili pravoŭ na 3 hady. Mo niejak i pieratryvaŭ by. Ale śledam pryjšoŭ list ź mihracyjnaj słužby. «Ja dumaŭ, što mnie pahražaje departacyja, tamu źviarnuŭsia da Viačasłava I., kab jon mnie paspryjaŭ. Ja viedaŭ, što jon pracuje ŭ milicyi. Toj abiacaŭ dapamahčy. Ja schadziŭ va ŭpraŭleńnie pa hramadzianstvie i mihracyi, tam napisaŭ zajavu, chadajnictva nie departavać mianie. Nu i ŭsio naładziłasia. Potym pieradaŭ Viačasłavu $2 tysiačy, jak toj i prasiŭ. Ja zaŭvažyŭ pry pieradačy hrošaj, što ŭsio-taki heta doraha», — raskazaŭ rasijanin na sudzie.
Andrej — dyrektar budaŭničaj firmy, u jakoj «zarobak atrymlivajuć u kanviertach».
Ź milicejskim čynoŭnikam paznajomiŭsia praz ahulnych znajomych. «Nu jak heta skazać kulturna… My sustrakalisia dla sumiesnaha pićcia śpirtnych napojaŭ. U łaźni taksama». Ale sumiesnyja pachody ŭ łaźniu nie stvaryli siabroŭskich adnosin pamiž mužčynami. Milicyjant vyrašyŭ «nahreć» pryjaciela. Pavodle abvinavačvańnia, jon nijak nie vyrašaŭ pytańni z mahčymaj departacyjaj, bo nie vałodaŭ takimi paŭnamoctvami i nikoha nie prasiŭ dapamahać. Ale hrošy ŭziaŭ. U rasijanina — dvoje niepaŭnaletnich dziaciej, jany hramadzianie Biełarusi, što vyzvalaje jaho ad departacyi. Pra heta viedaŭ i načalnik.
Śledstva paličyła, što słužbovaja asoba ŭviała ŭ zman davierlivaha rasijanina. Takija dziejańni pryznali machlarstvam i padbuchtorvańniem da chabaru.
Andrej choć i paličyŭ, što za svajo spakojnaje žyćcio zapłaciŭ «doraha», ale pa zastupnictva źviarnuŭsia jašče adzin raz. Tolki nie dla siabie. Viasnoj 2014 brat jahonaha kampańjona trapiŭ u miždziaržaŭny vyšuk za machlarstva ŭ Maskoŭskaj vobłaści. Andrej paprasiŭ u milicejskaha načalnika vyrašyć heta pytańnie. Nie za tak, zrazumieła. I spravu ŭłahodzili: biehły rasijanin pryjechaŭ u Homiel, dzie jaho sfatahrafavali, kaleham u Rasiju paviedamili, što zatrymali ŭciekača. Dakumienty adpravili ŭ Chimki (Maskoŭskaja vobłaść), ale mužčynu adpuścili. A na radzimie jaho źniali z rasijskaha ŭliku.
Za takuju pasłuhu Viačasłaŭ atrymaŭ 4 tysiačy dalaraŭ i hadzińnik Tissot, jaki acanili ŭ 9 miljonaŭ rubloŭ.
Na sudzie były milicejski načalnik całkam pryznaŭ epizody pa machlarstvie i chabary. Voś tolki hadzińnik jon paličyŭ padarunkam — nijakim nie chabaram.
Razhlad spravy praciahvajecca.
