Admieniena pres-kanfierencyja pa aktualnych pytańniach ekanomiki i valutnaj palityki, jakaja miełasia pačacca 24 śniežnia ŭ 14.00 u Nacyjanalnym pres-centry Biełarusi.
Jak zajaviŭ namieśnik dyrektara pres-centra Alaksiej Cybulka, mierapryjemstva admieniena «pa abjektyŭnych pryčynach». «My vystupili arhanizatarami hetaha mierapryjemstva, i nam nie ŭdałosia hetu pres-kanfierencyju sabrać, tamu my jaje admianiajem. Nie pa pryčynie kankretnych udzielnikaŭ ci ministerstvaŭ, prosta ŭ nas heta nie atrymałasia zrabić», — padkreśliŭ jon.
Paviedamleńnie ab praviadzieńni pres-kanfierencyi pa aktualnych pytańniach ekanomiki i valutnaj palityki było raspaŭsiudžana Nacyjanalnym pres-centram napiaredadni, 23 śniežnia. U joj płanavaŭsia ŭdzieł pieršaha namieśnika kiraŭnika aparata Saŭmina, kiraŭnika sakrataryjata premjer-ministra Biełarusi Alaksandra Zabaroŭskaha, pieršaha namieśnika ministra finansaŭ Maksima Jermałoviča i namieśnika staršyni praŭleńnia Nacbanka Siarhieja Kalečyca.
Uličvajučy padziei apošnich dzion, mahčymaść sustrecca z čynoŭnikami hetych viedamstvaŭ vyklikała vialikuju cikavaść u žurnalistaŭ. Nahadajem, 20 śniežnia ŭ Biełarusi ŭviedzieny 30-pracentny zbor pry kupli zamiežnaj valuty ŭ fizičnych i jurydyčnych asob. Heta rašeńnie Nacbank rastłumačyŭ ažyjatažnym popytam na zamiežnuju valutu, jaki byŭ vyklikany devalvacyjaj rasijskaha rubla. U vyniku realny kurs prodažu dołara ŭ abmiennych punktach (z ulikam kamisii) pieravysiŭ 14 tys. biełaruskich rubloŭ. 23 śniežnia kamiercyjnyja banki pa rekamiendacyi Nacbanka pavysili kurs kupli zamiežnaj valuty na 25%.
Niezaležnyja ekanamisty rezka krytykujuć pryniatyja miery. Rašeńnie ab valutnych abmiežavańniach jany źviazvajuć z publičnaj zabaronaj Alaksandra Łukašenki pravodzić devalvacyju. Mnohija ekśpierty miarkujuć, što situacyja raźvivajecca pa scenaryi 2011 hoda. Jany taksama prahnazujuć, što bolš žorstkija ŭmovy kupli valuty abiernucca vialikim stratami jak dla subjektaŭ haspadarańnia, hetak i dla hramadzian, a množnaść kursaŭ pryviadzie da admyvańnia abarotnych srodkaŭ u pradpryjemstvaŭ-eksparcioraŭ.
