Telekanał «Biełaruś-1»
pačynajučy ad 7-j viečara, budzie pakazvać rasijskija «Jołki». Ź pierapynkami na «Panaramu» i zvarot Łukašenki možna pahladzieć «Jołki», «Jołki-2» i «Jołki-3».
ANT
abrała tradycyjny šlach — jaki Novy hod biez «Ironii losu»? Film pačniecca a 6-j. Paśla jaho zapłanavanyja muzyčna-zabaŭlalnyja šou «Pravodziny staroha hoda», a paśla «Palot u Novy hod».
«RTR-Biełaruś»
prapanuje sustrakać Novy hod u atmaśfiery ruskaha duchu. Ceły viečar hledačoŭ buduć zabaŭlać rasijskija zorki. Spačatku śviatočny kancert z Kramla, paśla šou z Maksimam Hałkinym i Filipam Kirkoravym i, narešcie, «Błakitny ahieńčyk» – kudy ž bieź jaho? «RTR-Biełaruś» – adziny kanał, jaki budzie pakazvać zvarot Uładzimira Pucina.
«NTV-Biełaruś»
31 śniežnia vyrašyła pryśviacić «Leśniku». «Vostrasiužetny sieryjał» pačniecca a 8-j ranicy i ź pierapynkam na naviny budzie iści da 9-j viečara! Zatym zapłanavanaja infarmacyjnaje šou «Anatomija hoda», a paśla boju kurantaŭ – kancert šansona «Eechch, razhulaj».
«Biełaruś-5»
prapanuje ŭzhadać najlepšyja spartyŭnyja momanty hoda. Ad ranicy 31 śniežnia buduć pakazvać pieramožnyja matčy zbornaj Biełarusi na čempijanacie śvietu pa chakiei. Ich naličyłasia čatyry — z Kazachstanam, Šviejcaryjaj, Hiermanijaj i Łatvijaj. Zatym možna budzie pahladzieć pieramožnyja honki Darji Domračavaj na Alimpijadzie. A pierad samym Novym hodam — mastackaja himnastyka.
«Staličnaje telebačańnie»
jak i letaś, padrychtavała muzyčna-humarystyčny prajekt «Na tym ža miescy ŭ toj ža čas». Pierad im pakažuć saviecki film «Adzinokim pradastaŭlajecca internat».
«Biełsat» stvaryŭ biełaruski rymejk «Karnavalnaj nočy»
A «Biełsat» u jakaści navahodniaha «Błakitnaha ahieńčyka» pakaža biełaruski rymejk «Karnavalnaj nočy»
«My śmiajomsia, heta satyra. «Karnavalnaj nočy» užo 60 hadoŭ, a kamiedyja hetak ža aktualnaja i hladzielnaja, jak i ŭ SSSR», — kaža režysior rymejka Juryj Chaščavacki. Miarkujcie sami: na pačatku filma Dzieda Maroza aryštoŭvajuć i sadžajuć u turmu na Akreścina.
Zamiest piesieńki «Ach, Tania, Tania, Taniečka» prahučyć «Lida, Lidačka». Pamiatajecie: «Rabotnica pitanija pristavlena k borŝam…».
Kiraŭnička ž hałoŭnaha banka krainy zaśpiavaje ramans…
Chaščavacki abiacaje, što budzie viesieła: «Tak, realnaść sumnavataja, panuje ciomnaja siła, ale razam na jaje, nikčemnuju, i śmiešna hladzieć. Jak i ŭ našym śviatočnym šou, usio budzie dobra!»
